Redaksııamyzǵa ult azattyq kóterilis qaharmandaryna laıyqty qurmet kórsetýdi surap hat jazǵan Súıindik qajy Jumabaıuly kóteriliste erlik kórsetkenderdiń ishinde Jeksenbi Oralbaıuly da bar ekenin aıtady.
Patsha jazalaýshy áskerlerimen Ereımen kóterilisshileriniń arasynda birneshe qaqtyǵysý bolǵan. Sonyń alǵashqysy «Jýanadyrda», ekinshisi «Keń-asýda», úshinshisi «Oljabaı» aýylynyń mańynda, tórtinshisi «Shákeı», aýylynda al besinshisi «Ereımen-Qorjynkól» mańaıyndaǵy jazyqta ótken. Bul sońǵy qaqtyǵysta bolystardyń elge bolyspaý sebebinen kóterilisshiler jeńiliske ushyraǵan.
Súıindik qajy Jumabaıuly Jeksenbi Oralbaıulynyń kóterilis kezeńindegi erligin baıandap berdi.
«Tún qarańǵyda olarǵa jasaqshylar shabýyl jasady. Olardyń arasynda Oralbaı uldary Jeksenbi jáne Jumabaı syndy aazamattar boldy. Úı ishindegi soldattarǵa úıden shyǵýǵa buıryq berildi biraq soldattar buıryqty oryndaýdan bas tartqan soń Jeksenbi qatarynan sýyrylyp shyǵyp, úıdiń tóbesine minip, peshtiń murjasynyń janyn tesip, úı ishine janǵan ot tastap jatqanda ishten myltyq atylyp qaza bolǵan. Bul týraly inisi Jumabaı esteliginde jazyp qaldyrǵan», dep til qatqan qarııa Keńes úkimeti, Qazaqstan egemendigin alǵannan keıin bul sııaqty kóterilisshiler tarıh sabaqtastyǵynda laıyqty baǵalanbaı kele jatqanyn aıtty.
«1916 jylǵy Ereımen kóterilisi týraly kezinde az jazylǵan joq. Jazýshy Sábıt Muqanov, Sáken Seıfýllın, qart-jýrnalıst Ǵalymjan Muqatov, aqyn О́mirbek Tuqpıuly, Aqtybaı Imaqan aqyn, saıasatker, jazýshy Qazybek Súleımenuly kezinde ortalyq komıtetke, ortalyq gazetterge, Arqa Ajary gazetine, jazýshy jýrnalıst Ilııas Qaraǵozın jazǵan edi. Biraq aıaqsyz qalyp, býrjýazııalyq-ultshyldyq kórinister dep aıyptaldy», deıdi Súıindik qajy Jumabaıuly.
Súıindik qajy Jumabaıuly Aqmola oblysynyń ákimi Ahmetjanov Marat pen Ereımentaý aýdanynyń ákimi Muqatov Nurlan atyna mynadaı ótinish tilegin jetkizdi: «Kókshetaý jáne Ereımentaý qalalarynda 1916 jylǵy qaharmandarǵa arnap alleıa salynyp, monýment taqtaǵa olardyń esimin jazýdy jáne bir kóshege 1916 jylǵy qaharmandar ataýy berýdi usynamyn. Sondaı-aq, 2022 jyldyń qazan aıynda Kúnshalǵan aýylyndaǵy parkte Ult-azattyq kóterilisshilerdiń qurmetine qoıylǵan eskertkish taqtaǵa Oralbaıuly Jeksenbi esimi berilse», dedi ol.
Biz de óz kezegimizde usynys zerdelenip, oń sheshimin tabatynyna senim bildiremiz.
