Basty keıipker – baıdyń murageri Chına (Jeńis Omarov). Jas jigit sán-saltanatqa ábden boı úıretip, ózine bári ruqsat dep oılaıdy. Alaıda onyń ákesi (Jandarbek Sadyrbaev) ulyn sabasyna túsirýdi oılap, erekshe aıla-amalǵa barady. Elden erekshe psıhologpen (Dýlyǵa Aqmolda) birigip, XIX ǵasyrdaǵy qazaq aýylynyń ómirin qaıta jasaıdy. Chınany sol ortaǵa jiberip, «Baı balasy adam bola ma?» degen suraqqa jaýap izdeıdi.
«Álemdik kınoda sátti týyndylardy negizge alyp, olardyń adaptasııasyn usyný – keń taralǵan ári tanymal ádis. Biz de osy baǵytty qoldanyp, ózimizge úlken talap qoıdyq. Qazaqstan qoǵamynda majorlardyń taqyryby óte ózekti, sol sebepti «Holop» franshızasy bizge sáıkes keldi. Bizge qazaq mentalıtetin, qundylyqtary men ázilin eskere otyryp, beıimdeý óte mańyzdy boldy. Sonymen qatar «Malaı» – tolyqtaı qazaq tilinde túsirilgen fılm», dep atap ótti «Unico» kompanııasynyń bas prodıýseri Anara Júnisova.
Jeńis Omarov (Zheka Fatbelly) úshin de atalǵan joba úlken synaq boldy. Sebebi bul – onyń basty róldegi debıýti. Rejısser men túsirilim alańyndaǵy áriptesteriniń aıtýynsha, bloger óz rólin tamasha oryndap, kadrda shynaıy kórindi.
«Meniń keıipkerim neshe túrli qıyndyqty bastan ótkerdi. Fızıkalyq jaǵynan óte aýyr boldy, biraq qyzyqty sátter de az emes edi. Ásirese atpen júrý jáne shabý qıynǵa soqty. Qazir sol túsirilim kúnderin saǵynyshpen eske alamyn, demek, bári jaqsy ótti», dedi Jeńis Omarov (Chına).
«Elimizde balalar men eresekterge birdeı qyzyqty bolatyn fılmder kóp emes. Sondyqtan «Malaı» jobasynda jumys isteý maǵan qyzyq boldy. Chınanyń oqıǵasy men onyń ótken ǵasyr aýylyndaǵy qyzyqtary kishkentaı kórermendi kúldirse, úlkender úshin majordy tárbıeleý taqyryby oı salýy múmkin», deıdi fılm rejısseri Ernar Nurǵalıev.
Aıta keteıik, fılmge Dýlyǵa Aqmolda, Laýra Myrzahmet, Jandarbek Sadyrbaev, Ermek Shynbolatov, Aıda Qurmanǵalıeva (Mona), Sabına Movlaeva, Hamıt Erdehan syndy belgili akterler qatysqan.
