Áıelder arasynda álem chempıony atanǵan sheteldik balýandardyń qarymy qýantty. Halyqaralyq arenada ulttyq kúresimizdiń nasıhaty nyǵaıyp, qarqyn alyp kele jatqany aıqyndala tústi. О́zge elderdiń balýandary Azııa chempıonaty, álem kýbogi syndy saıystarda da altyn medal úshin ne bel, ne belbeý úzilgenshe kúresip júr. Delı tórinde de básekelestiktiń joǵary ekeni kórindi. Ásirese 52 kg salmaqta synǵa túskender arasynda ózbek qyzy Sıtora Elmýradova sheberligimen tánti etti. Fınaldyq beldesýde úndistandyq Mýskan Mýskandy «Tıagaradj» ulttyq stadıonyn dúbirge bólegen jergilikti jankúıerlerdiń qıqýlaı qoldaǵanyna qaramastan aıqyn jeńdi. Úndistandyq qyzdardy da qazaq kúresinen osal deýge áste bolmaıdy. Máselen, 60 kg salmaqta úndistandyq Anný Anný qalaı beldesti! Mýskan jerlesiniń ketken esesin qaıtaryp, fınaldyq beldesýde О́zbekstan sportshysy Hýrshıda Týhlıevadan basym tústi. Al 70 kg salmaqta Nıderland eliniń balýan qyzy Sem Van Dýnge quddy bir qazaq dalasynda týyp, bala jasynan tól kúresimizben tel óskendeı áser qaldyrdy. Ádis-tásildi oraıly qoldanýy qalaı, qorǵanysta da aptyqqan joq. 77 kg salmaq dárejesinde qarsylastarynyń bárin qoǵadaı japyrǵan grýzın qyzy Nıno Odzelashvılıdiń qyrqa shalýdy, tobyqtan qaǵýdy sheber meńgergenine tánti bolasyń.
Erler synynda asa aýyr salmaqta (+100 kg) ózbekstandyq balýan Mýksın Hısomıddınov álemdik dodanyń altyn medalin ıelendi. Fınalda ol jerlesimiz Nurdáýlet Jarylǵapovty jyǵyp ketti.
Qazaq kúresi 2022 jyldan beri Birikken kúres álemi (UWW) halyqaralyq uıymyna múshe bolyp bekitildi. Osydan bastap ulttyq oıynymyzdan ótetin ǵalamdyq dodalar osy uıymnyń kúntizbelik josparyna engizilip keledi. Taǵy bir aqjoltaı aqparat «Qazaq kuresi» qaýymdastyǵynyń bas dırektory Damır Bekbosynov osy uıymnyń ulttyq kúres túrleri komıteti atqarýshy keńesine qabyldandy. Bul baılam tól oıynymyz, ulttyq kúresimiz jazǵy Azııa oıyndarynyń baǵdarlamasyna enýine nyq qadam bolýǵa tıis.
