Sýret: kff.kz
Bas bapkerdiń mindetin atqarýshy Álı Álıev matchtan keıingi baspasóz jıynynda jigitterdiń tegis jerde súrinip, óreskel jańsaqtyq jibergenin aıtty. Rasynda 9-mınýtta Ýels quramasynyń jartylaı qorǵaýshysy Denıel Djeıms utymdy sátti ońtaıly paıdalanyp, enshisine gol jazdy. Anglııanyń «Lıds Iýnaıted» klýbynyń lypyp turǵan oıynshysyn bizdiń qorǵaýshylar kógendeı almady. 32-mınýtta penaltıden ulttyq quramanyń kapıtany Ashat Taǵybergen tarazy basyn teńestirgenimen, ekinshi taım bastalǵan sátte-aq (47-mınýtta) «Tottenhem» klýbynyń qorǵaýshysy Benjamın Devıs nátıjeni eseledi. Úshinshi goldy Shotlandııanyń «Reındjers» klýbynan Germanııanyń «Gannover» klýbyna sarsha tamyzǵa deıin jalǵa berilgen Robbı Matondo 90-mınýtta soqty.
Ýelske qarsy matchta Dastan Sátbaev ulttyq quramanyń sapyndaǵy tusaýkeser oıynyn ótkizip, eń jas fýtbolshy atandy. 22 naýryz kúni «Kardıff sıtı» stadıonynda ótken oıynda alańǵa shyqqan Dastan 16 jastan 7 aı 11 kún asty. Buǵan deıin Jambyl Kókeev 2006 jyldyń 28 aqpanynda Fınlıandııa ulttyq quramasyna qarsy oıynda 17 jastan 5 aı 8 kún asqanda alańǵa shyqqan bolatyn.
Fýtbolshylarymyz álem chempıonatyna irikteý aıasyndaǵy ekinshi týrdy da syrt alańda ótkizip, Lıhtenshteın ulttyq quramasyn 0:2 esebimen utty. 42-mınýtta Maksım Samorodov esep ashsa, 45-mınýtta Aleksandr Marochkın nátıjeni eseledi. FIFA-nyń reıtınginde kósh sońynda ıaǵnı 204-orynda turǵan Lıhtenshteın ulttyq quramasynan basym túsetinimiz aıdan anyq edi. Oıyndy qorytyndylaǵan bas bapkerdiń mindetin atqarýshy Álı Álıev qoldaý kórsetken jankúıerlerge alǵysyn jetkizip, bul jeńiske toqmeıilsýge bolmaıtynyn aıtty. Elimizdiń ulttyq quramasy resmı matchtarda sońǵy ret 2023 jyldyń 17 qarashasynda jeńiske jetip, óz alańymyzda San-Marıno quramasyn 3:1 esebimen utqan edi. Álem chempıonatyna irikteý kezeńderinde sońǵy ret 2013 jyly óz alańymyzda Farer araldary ulttyq quramasyn 2:1 esebimen utty.
Syrttaǵy eki match ulttyq qurama oıynshylarynyń daıyndyǵy qanshalyqty ekenin baǵamdap berdi. J tobynda eki týrdan keıin ázirge Soltústik Makedonııa men Ýels quramalary 4 upaımen kósh bastap tur. 3 upaı oljalaǵan bizdiń ulttyq qurama 3-satyǵa ornyqty. Kelesi matchty óz alańymyzda ótkizip, 9 maýsymda Soltústik Makedonııa quramasyn qabyldaıdy.
