2023 jyly Eńbek jáne halyqty áleýmettik qorǵaý mınıstriniń buıryǵymen bekitilgen qaǵıdaǵa sáıkes bilim berý uıymdaryn 5 jyl ishinde bitirgen ári 35 jastan aspaǵan jumyssyz túlekter jastar praktıkasyna qatysa alady. Salyqtar, mindetti zeınetaqy jarnasy syndy áleýmettik aýdarymdardy eskere otyryp, eńbekaqy somasy 30 aılyq eseptik kórsetkish mólsherinde bolmaq. Jastar praktıkasyna qatysýǵa yqylas tanytqan túlek óziniń turǵylyqty jeri boıynsha mansap ortalyǵyna ótinish jazyp, qajetti qujatyn ótkizse jetkilikti.
«Eńbek» memlekettik baǵdarlamasynyń III baǵyty sanalatyn «Jastar praktıkasy» arqyly byltyr 33,3 myń adam jumysqa ornalasty. Halyqty jumyspen qamtýdy nyǵaıtý maqsatynda qolǵa alynǵan ıgi bastama aıasynda jumys berýshi jastarǵa kásibı bilim men jumys tájirıbesin úıretý úshin arnaıy tálimger de bekitedi.
«Jastar praktıkasyn» qarjylandyrýdy Eńbek mobıldiligi ortalyǵy «Azamattarǵa arnalǵan úkimet» memlekettik korporasııasymen birlese aı saıynǵy jalaqy tóleý arqyly júzege asyrady. «Jastar praktıkasy» boıynsha ortasha jalaqy mólsheri 109,5 myń teńge bolsa, eń joǵary soma Aqtóbe oblysynda – 120,9 myń teńge.
Byltyr «Jastar praktıkasy» boıynsha jumysqa ornalastyrý kórsetkishi Túrkistan oblysynda joǵary boldy – 8,6 myń adam, odan keıin Qyzylorda oblysy – 3,2 myń, Jambyl oblysy –2,6 myń, Shymkent qalasy 2,4 myń adam.
Baǵdarlama arqyly jumysqa ornalastyrylǵandar arasynda eń kóp suranysqa ıe mamandyqtar mynadaı: meıirger – 2 216, bastaýysh synyp muǵalimi – 1 498, zańger – 1 481, dene shynyqtyrý muǵalimi – 1 323, feldsher – 1 277 adam.
