Sýretti túsirgen – Aqádil RYSMAHAN
Oblys ákimdigi Kásipkerlik jáne ındýstrııalyq-ınnovasııalyq damý basqarmasynyń basshysy Aspandııar Seısebaev keltirgen derekke sensek, zaýyt jumysy jyl ótken saıyn alǵa basqan. «Zapchast» AQ qazir jylyna 100 myń tonnadan astam bolat pen shoıyn óndirip otyr. Kásiporyn basshylary óndiriske jańa tehnologııany engizý arqyly ónim kólemin eki ese arttyrýǵa múddeli.
«О́ńir óndirisiniń brendine aınalǵan kásiporynda jumys qarqyny báseńsigen emes. Munda 588 adam eńbek etedi. Irgeli kásiporynda elektrmen bolat balqytý, bolat quıý, mehanıkalyq shtamptaý jáne ámbebap sehtary jumys istep tur. Tórt sehtyń jumysyna óz isin jetik meńgergen bilikti mamandar jumyldyrylǵan. Uzaq jyl boıy jemisti jumys atqaryp kele jatqan kásiporynnyń isin ilgeriletý maqsatynda ujym basshylary jańa qadamdarǵa baryp, táýekelge bel býdy. Munda temirjol jyljymaly quramdarynyń quramdas bólikteri shyǵarylatynyn bireý bilse, bireý bilmes. Sonymen qatar keshen aýmaǵynda eýropalyq úlgidegi sapaly armatýra shyǵaratyn «Armatýra Taraz zaýyty» JShS iske qosyldy. Bir sózben aıtqanda, mundaǵy qalypty jumys yrǵaǵy ýaqyt ótken saıyn arta túsken», deıdi Aspandııar Seısebaev.
«Armatýra Taraz zaýyty» JShS bir aýysymda 300 tonnaǵa deıin armatýra shyǵarýǵa qaýqarly. Kásiporyn basshylyǵy qoldan kelgenshe qyzmetkerlerdiń jaǵdaıyn jasap otyr. Zaýytta óndirilgen ónim birinshi kezekte ishki naryqtyń qajettiligin qamtamasyz etedi. Budan bólek, Reseıge eksporttalady.
Zaýyt basshylyǵy ýaqyt kóshinen qalmaý úshin beldi bekem býǵan. Alǵa qoıǵan aıqyn maqsaty bar. Bıyl shildeden bastap óndiriletin ónim túrin kóbeıtý josparlanyp otyr. Sondaı-aq óndiris kólemin bir aýysymda 300 tonnadan 400 tonnaǵa deıin arttyrý josparlanǵan.
«Zapchast» AQ-da reversıvti materıaldardy óńdeıtin seh salý jobasy júzege asyrylyp jatyr. Jańa sehty paıdalanýǵa berý arqyly bolat balqytý óndirisiniń ózindik qunyn 50%-ǵa deıin tómendetýge múmkindik týady. Bul árıne, kásiporyn úshin óte tıimdi joba bolmaq. Quıý sehynyń ónimdiligin 200%-ǵa arttyrý múmkindigi de bar. Jańa sehtyń jobalyq qýaty – jylyna 30 myń tonna», deıdi jaýapty basqarma basshysy.
Joǵaryda aıtylǵan 4 sehtan bólek, jóndeý-mehanıkalyq jáne elektr jóndeý ýchaskeleri, ortalyq zerthana, qýaty 80 MVt 110/6 kV transformatorlyq qosalqy stansa, kólik-qoıma bólimshesi bar. Uńǵymalar jáne sýsorǵy, kompressorlyq stansalar, modeldik óndiris, ıaǵnı zaýyt óndiretin negizgi jáne qosalqy bólshekterdiń modelderin shyǵarý jolǵa qoıylǵan. О́ndiris aýdany 35,2 myń sharshy metrden astam aýmaqty quraıdy.
Kásiporynda ornatylǵan «Disamatic» quıý jáne qalyptaý mashınasy jumysty júıeleýge aıtarlyqtaı yqpal etedi. Bul jabdyq metall quıý qalyptaryn avtomattandyryp, sapaly ónim alýǵa aıtarlyqtaı kómektesedi. Kásiporyn jetekshileri danııalyq qural-jabdyqty temirjolǵa kerekti elementterdi, ónerkásipke jáne aýyl sharýashylyǵyna qajetti tehnıkany ázirleýde taptyrmas qural desedi. Jalpy, «Disa» qalyptaý mashınalary temirjol quramdarynyń qurylymdyq bólshekterin óndirý úshin de asa qajet kórinedi.
Jambyl oblysy
