Erlan Qoshanov Qazaqstan men Qytaı qarym-qatynasy jańa «altyn 30 jyldyqta» máńgilik jan-jaqty strategııalyq áriptestik rýhynda nyǵaıyp kele jatqanyn atap ótti.
– Bul úzdiksiz damýdyń basty qozǵaýshy kúshi retinde kóshbasshylarymyzdyń jeke dostyq baılanystary men eren eńbegin aıtýǵa bolady. Ásirese keıingi jyldar qazaq-qytaı qarym-qatynasyn jańa deńgeıge kóterýde mańyzdy kezeńge aınaldy. Memleketterimizdiń basshylary Qasym-Jomart Toqaev pen Sı Szınpınniń salyp bergen jolymen parlamentaralyq baılanystarymyzdy odan ári damytamyz dep senemin, – dedi Májilis tóraǵasy.
Palata spıkeri mártebeli meımanǵa eldegi júrgizilip jatqan saıası-ekonomıkalyq reformalar týraly málimet berip, parlamentaralyq yntymaqtastyqqa jeke toqtaldy.
Bul oraıda eki el Parlamentteriniń yqpaldastyǵyn nyǵaıtýda byltyrǵy Májilis delegasııasynyń Qytaıǵa sapary tyń qarqyn berdi. Erlan Qoshanov bastaǵan delegasııa Beıjiń, Úrimshi qalalarynda bolyp, eldiń basshylyǵymen jáne Parlamenttegi áriptesterimen jemisti kelissózder júrgizgen edi.
– Ekijaqty áriptestikti damytýda zań shyǵarýshy organdardyń mańyzy men róli erekshe. Jalpy, eki el parlamentteriniń tájirıbe almasatyn, úırenetin tustary az emes. Biz parlamentaralyq yntymaqtastyqty odan ári nyǵaıtýǵa múddelimiz. Qytaı tarapynan da dál osyndaı yqylas bar ekenin bilemiz. Osy turǵyda áriptesterimizben zań shyǵarý salasynda túrli baǵyttar boıynsha tájirıbe almasyp kelemiz, – dedi Erlan Qoshanov.
Eki el arasyndaǵy partııaaralyq áriptestiktiń de keleshegi zor. Áńgimelesý barysynda taraptar «Amanat» partııasy men Qytaı Kommýnıstik partııasy arasyndaǵy yntymaqtastyqty nyǵaıtý máselesin de talqylady.
О́z kezeginde Lıý Szıanchao elderimiz arasyndaǵy strategııalyq áriptestiktiń odan ári qarqyndy damı beretinine senim bildirdi.
– Qytaı Kommýnıstik partııasy men «Amanat» partııasyn baılanystyratyn ortaq maqsattar kóp. Ol – eń áýeli bizdiń memleketterimizdiń damýy jolyndaǵy jaýapkershilik. Biz birlesip, kóshbasshylarymyzdyń strategııalyq baǵdaryn ustanyp, elderimizdiń odan ári damýyna kúsh salýǵa tıispiz. Memleket basshylarynyń senim men syılastyqqa negizdelgen berik dostyǵy halyqtarymyz úshin óte qundy. Endigi kezekte olardyń ýaǵdalastyqtaryn iske asyrý – bizdiń partııalarymyzdyń ortaq mindeti, – dedi Lıý Szıanchao.
