Foto: Úkimettiń baspasóz qyzmeti
Aıta keteıik, jobaǵa sáıkes áýejaı Zaısan qalasynan shamamen 25 shaqyrym jerde ornalasqan Sátbaı aýylynyń mańyndaǵy burynǵy áskerı áýeaılaq bazasynda salynady. 184,5 gektar jerdi alyp jatqan ýchaske geografııalyq jáne meteolorogııalyq jaǵdaıdy, sondaı-aq logıstıkalyq qoljetimdilikti eskere otyryp tańdalǵan.
Áýejaıda aldaǵy ýaqytta keńeıtý múmkindigimen uzyndyǵy 2200 metr bolatyn ushý-qoný jolaǵy salynady. Bul áýejaı aımaǵynda Bombardier Q400, ATR-72 jáne basqa da uqsas tıptegi zamanaýı áýe kemelerin qabyldaýǵa múmkindik beredi. Qazir otandyq áýe kompanııa ATR-72 ushaqtaryn satyp alý máselesin pysyqtap jatyr.
Joba aıasynda 4 áýe kemesine arnalǵan perron, saǵatyna 150 jolaýshyǵa deıin ótkizý qabileti bar 4000 sharshy metrlik zamanaýı aerovokzal, komandalyq-dıspetcherlik pýnkt, avarııalyq-qutqarý qyzmeti, meteostansııa jáne radıonavıgasııalyq jabdyqtar qarastyrylǵan.
«Áýejaı qurylysy aıaqtalyp, nysan qoldanysqa berilgen soń Qytaıdyń Úrimshi, Altaı jáne Qanas qalalaryna halyqaralyq baǵyttar ashý josparlanǵan. Astana, Almaty jáne О́skemenge qatynaıtyn ishki baǵyttar turaqty áýe baılanysyn qamtamasyz etip, bıznes úshin jańa múmkindikter ashyp, el turǵyndarynyń júrip-turýyn jaqsarta túspek», dedi Marat Qarabaev.
Qazir Zaısanǵa jyl saıyn shamamen 23 myń týrıst keledi. Áýejaı iske qosylyp, ınfraqurylym damı túskende bul kórsetkish 136 myń týrıstke deıin ósedi dep kútiledi.
Marat Qarabaev áýejaı qurylysy Qazaqstannyń logıstıkalyq áleýetin damytýǵa qosymsha múmkindik ashatynyn atap ótti. Sátbaı aýyly mańynda jańa áýejaı salý jáne «Qalbataý-Maıqapshaǵaı» kúre jolynyń rekonstrýksııasyn aıaqtaý jumystary Zaısan qalasynda arnaıy iri logıstıkalyq hab ashýǵa múmkindik beredi. Kólik mınıstri qazir bul máseleni Reseı Federasııasy men Qytaı Halyq Respýblıkasyndaǵy áriptestermen pysyqtalyp jatqanyn atap ótti.
Bul rette Tuǵyl aýylynda ózen porty salynady. Bastapqy kezeńde júkter Tuǵyl portyna avtokólikpen tasymaldanady. Odan ári Reseı Federasııasyna qaraı ózen arqyly keme qatynasy ornatylady.
«Júkterdiń bastapqy kólemi 2 mln tonna bolsa, ýaqyt óte kele bul kórsetkish 10 mln tonnaǵa deıin artady dep kútilýde. Qytaıdaǵy áriptestermen qazir «Tuǵyl» portyn temirjolmen baılanystyratyn jáne Reseıdegi Ob ózenine, odan ári Soltústik teńizge shyǵatyn «Qytaı-Qazaqstan-Reseı» mýltımodaldy logıstıkalyq marshrýtyn qurýǵa baǵyttalǵan tórtinshi temirjol ótkeli pýnktin salý pysyqtalyp jatyr», delingen habarlamada.
Sondaı-aq bıyl mamandar Shyǵys Qazaqstan óńirindegi barlyq bes temirjol vokzalyn (О́skemen-1, Altaı, Kúmistaý, Rıdder, Shemonaıha) jóndeıdi.
