Jalpy, sary qurlyqtyń basty dodasynda Japonııa quramasynyń komandalyq esepte ózgelerge ese jibergen kezderi sırek. Máselen, sol kezden beri uıymdastyrylǵan 27 jarystyń 19-ynda kún shyǵys eli ókilderiniń asyǵy alshysynan tústi. Qytaı qyzdarynyń alty ret mereıi ústem boldy. 2021 jyly koronavırýstyń kesirinen Almatyda jalaýy jelbiregen jarysqa atalǵan memlekettiń burymdylary kelmedi. Balýan Sholaq atyndaǵy sport saraıynda ótken sol básekede Úndi eli ókilderiniń baq juldyzy jandy.
Tusaýkeser Azııa chempıonatynda elimizdiń quramasy bir qolaǵa qol jetkizdi. Ol júldeni 57 kg salmaqta beldesken Svetlana Volkova ıelendi. Atalǵan dodada elimiz barlyǵy 86 júlde oljalady. Onyń 19-y altyn, 16-sy kúmis, 51-i qola. Jeńis tuǵyrynyń eń bıik satysyna kóterilgender qatarynda Svetlana Iаroshevıch (2003), Juldyz Eshimova (2007), Elena Shalygına (2009, 2012), Tatıana Amanjol (2009, 2013, 2014, 2020), Gúzál Manıýrova (2010, 2011, 2012, 2014), Jámıla Baqbergenova (2020, 2022, 2023), Valentına Islamova (2021), Elmıra Syzdyqova (2021, 2023), Mádına Baqbergenova (2022) syndy sulýlar bar.
Jerlesterimiz úshin 2009, 2012, 2014, 2019, 2020, 2021, 2022, 2023 jyldar tabysty boldy. Sol jarystarda Ánuranymyz eki retten shyrqaldy. 2003, 2007, 2010, 2011, 2013 jyldary bir-bir altynnan ıelendik. Qalǵan básekelerde kúmis pen qolany qorjynǵa salǵanymyzben, bas júldege qol jetkize almadyq.
Azııa chempıonatynda barlyǵy 11 komandaǵa ǵana bas júlde buıyrǵan eken. Solardyń arasyndaǵy eń tabystylary – Japonııa men Qytaı. Japondar 102 altyn alsa, qytaılyqtar 57 ret top jardy. Osy kórsetkish jóninde 19 altyny bar elimiz úshinshi orynda. Basqa elderdiń nátıjeleri mynadaı: Mońǵolııa men Úndistan – 10, Qyrǵyzstan – 8, Ońtústik Koreıa men Soltústik Koreıa – 4, Túrikmenstan men Taıpeı – 1.
2020–2023 jyldar aralyǵynda Nıý-Delı, Almaty, Ulanbatyr, Astanada ótken jarystarda elimizdiń áıelder quramasy eki altynnan oljalap, jalpy esepte úzdik úshtiktiń qatarynan kórindi. Jámıla Baqbergenova Azııanyń úsh dúrkin chempıon atansa, Elmıra Syzdyqovaǵa bul beles eki ret baǵyndy. Tatıana Amanjol, Valentına Islamova, Mádına Baqbergenovanyń bir márte mereıi ústem boldy.
Byltyr Bishkekte shymyldyǵy túrilgen básekede birde-bir burymdymyz altyn tuǵyrǵa kóterile almady. Alataýdyń arǵy betindegi aıqasty tórt qolamen qorytyndyladyq. Júlde ıegerleri – Laýra Almaǵambetova, Dıana Kaıýmova, Anastasııa Panasovıch, Elmıra Syzdyqova. Endi qazaq qyzdary Ammanda ótetin Azııa chempıonatynda sol olqylyqtyń ornyn toltyrady dep úmittenemiz.
Áıelder kúresinen 2024 jylǵy Azııa chempıonatynyń jeńimpazdary: 50 kg – Iýı Sýsakı (Japonııa), 53 kg – Kım Djıhang (Soltústik Koreıa), 55 kg – Mo Kııoka (Japonııa), 57 kg – Feng Ionsın (Qytaı), 59 kg – Jang Sı (Qytaı), 63 kg – Aısulý Tynybekova (Qyrǵyzstan), 65 kg – Mahıro Iosıtake (Japonııa), 68 kg – Nonaka Odzakı (Japonııa), 72 kg – Djang Sıan (Qytaı), 76 kg – Aıperi Medetqyzy (Qyrǵyzstan).
