Dúnıejúzilik toǵyzqumalaq federasııasynyń prezıdenti Álıhan Báımenov IýNESKO-nyń Materıaldyq emes mádenı murany qorǵaý jónindegi Konvensııa hatshysy Fýmıko Ohınatamen kezdesti. Kezdesýde Á.Báımenov 2020 jyly toǵyzqumalaq oıynyn Adamzattyń materıaldyq emes mádenı murasynyń Reprezentatıvtik tizimine engizilýine qoldaý kórsetkeni úshin alǵys aıtty. Kóne oıynnyń tarıhynan qulaǵdar etip, búgingi damý úderisin de tanystyrdy. Toǵyzqumalaq halqymyzdyń mádenı murasy sanalatynyn, zııatkerlik oıyn órken jaıyp kele jatqanyn jetkizdi.
Kezdesý barysynda Á.Báımenov IýNESKO Hatshylyǵyna toǵyzqumalaq taqtasyn syıǵa tartty. Byltyr Astana qalasynda V Dúnıejúzilik kóshpeliler oıyndary qarsańynda ǵaryshqa jetkizilgen tuzdyqty tabys etti.
IýNESKO ókilderin zııatkerlik oıynnyń erejesimen tanystyryp, joldastyq saıys ótkizdi.
Byltyr Halyqaralyq toǵyzqumalaq federasııasynyń uıymdastyrýymen Chehııada álem kýbogi túńligin túrdi. Sondaı-aq V Dúnıejúzilik kóshpeliler oıyndarynda toǵyzqumalaq saıysyna 41 memleketten 114 sportshy qatysyp, baǵyn synady. Rýmynııada jastar arasynda álem kýbogi, Túrkııada álem chempıonaty ótti. Mońǵolııa memleketi toǵyzqumalaqtan jasóspirimder arasynda halyqaralyq týrnırdi joǵary deńgeıde uıymdastyrdy. Toǵyzqumalaq oıyny ár qurlyqta qarqyndy damyp keledi, federasııalar kóptep ashylyp jatyr. Elimizde zııatkerlik oıynǵa baýlıtyn 5 681 úıirme bar. 200 myńǵa jýyq adam toǵyzqumalaq oıynyn sheber meńgergen, turaqty shuǵyldanady, 2 556 jattyqtyrýshy tirkelgen.
