Ekologııa jáne tabıǵı resýrstar mınıstri Erlan Nysanbaev atap ótkendeı, búginde elimiz kóleminde materıaldyq-tehnıkalyq jabdyqtar barynsha jańartylyp, birqatar orman órtin sóndirý tehnıkasy satyp alyndy. О́rtti erte anyqtaý júıeleri engizildi. Jańa orman tálimbaqtary quryldy. Erekshe qorǵalatyn tabıǵı aýmaqtar keńeıtilip jatyr. Qaldyqtardy kádege jaratý jobalary júzege asyrylady. Sırek kezdesetin janýarlar – jolbarystar, qulandar, Prjevalskıı jylqylary tabıǵatqa qaıta jiberiledi.
Ormandardy qorǵaýdy kúsheıtý, materıaldyq-tehnıkalyq bazany jańartýǵa respýblıkalyq bıýdjetten órtke qarsy, orman órtin sóndirý tehnıkasyn satyp alýǵa 5,4 mlrd teńge baǵyttaldy, jergilikti qurylymdardan 6,7 mlrd teńge bólindi. Orman órtterin tıimdi sóndirýge beıimdelgen traktorlar, arnaıy tehnıka, jabdyqtar satyp alyndy.
Orman órtterin erte anyqtaý júıesi «Qazaqtelekommen» birlesip júzege asyrylyp jatyr. «Jasyl aımaq», «Semeı ormany» sııaqty 24 orman sharýashylyǵy aýmaqtaryn zertteý jumystary bastaldy.
6 óńirde jańa orman tálimbaqtaryn qurý jumystary júrgiziletin bolady. Jalpy bıýdjet 21,2 mlrd teńgeni quraıdy, árbir tálimbaqqa 3,5 mlrd teńgeden qaralǵan. Onyń qýaty – 6 mln kóshet. Qurylys 2025 jyly bastalady. Bıoalýantúrlilikti saqtaý tujyrymdamasy ázirlenedi.
Jańa erekshe qorǵalatyn tabıǵı aýmaqtar – «Merke» óńirlik parki (86 myń ga), «Aral» (471 myń ga), «Jaıyq ormany» (46,9 myń ga) rezervattary qurylady. Ústirt, Qarataý, Ile-Balqash aýmaqtaryn 648 myń gektarǵa keńeıtý josparlanyp otyr. 6 EQTA-da baqylaý ótkizý pýnkterin avtomattandyrý, elektrondyq tólem júıesi engiziledi. Ormanshylarǵa arnalǵan bilim berý ortalyǵy ashylady.
2024 jyldan Prezıdenttiń «Taza Qazaqstan» bastamasy júzege asyrylyp keledi. Ekologııalyq qozǵalysqa 6 mln adam, onyń ishinde 230 myń erikti qatysty. 1,1 mln tonna qoqys jınalyp, 1,6 mln aǵash otyrǵyzyldy. Ekomádenıetti damytýdyń 2029 jylǵa deıingi Tujyrymdamasy bekitildi, óńirlik josparlar maquldandy. Ekologııalyq bastamalar qoǵam tarapynan belsendi qoldaýǵa ıe bolyp otyr.
2021 jyldan bastap 1,145 mlrd aǵash egildi. Endi 2 mlrd túp aǵash otyrǵyzylady. Sondaı-aq Aral teńiziniń qurǵaǵan tabanyn kógaldandyrý jumystary júrgiziledi, munda 1,1 mln gektarǵa sekseýil otyrǵyzý josparlanǵan.
Qatty turmystyq qaldyqtarǵa qatysty máselelerdi sheshý maqsatynda 238 mlrd teńgege 94 jobadan turatyn pýl qalyptastyryldy. Zamanaýı polıgondar salý, qaıta óńdeýdi damytý, qaldyqtardy bólek jınaýdy engizý negizgi baǵyttar sanalady. Sırek kezdesetin janýarlardy tabıǵatqa qaıta jiberý jumystary jalǵasady, olardy jersindirý baǵdarlamalary júıeli túrde júzege asyrylyp jatyr.
