Álem kýboginiń úmitti kezeńi

Dúbirli dodaǵa Azııa qur­lyǵynan Qazaqstan, О́zbekstan, Taıpeı, Úndis­tan elderi boksshylaryn úkilep qosyp otyr. Jalpy, 20-ǵa tarta elden 130 boksshy jarys kórigin qyzdyryp jatyr. Bizdiń boksshylar da altynnan úmitti.

55 kg salmaq dárejesinde syn­ǵa túsip jatqan Nursultan Al­tynbek jartylaı fınalǵa shyqty. Jerlesimiz alǵashqy jekpe-je­ginde brazılııalyq Maıkl Trındadeni yǵystyrdy. Maıkl byltyr Parıj Olım­pıadasyna qatysty, 2021 jyly Serbııada ótken álem chem­pıonatynyń shırek fınalynda Mahmud Sa­byrhannan jeńildi. Shırek fınaldyq jekpe-jekte Fransııa boksshysy Bilál Bınálıdi eńserdi. Endi úndistandyq Manısh Ratorıdi jeńse, álem kýboginiń altynyna talasady. Nursultan jastardan eresekter qataryna jýyrda ǵana aýysqanyna qaramastan, jaqsy qarym-qabiletin tanytty. Ol – 22 jasqa deıingi boksshylar arasynda eki dúrkin Azııa chempıony. Ulttyq quramada óz salmaǵynyń serkesi atanýdan úmitti.

Mundaı bási joǵary saıysqa alǵash qatysqan taǵy bir boks­shymyz Nurzat Ońǵarov (50 kg) birden shırek fınaldyq jekpe-jekke túsken edi. О́kinishke qaraı, ózbekstandyq Asylbek Jalılovke ese jiberdi. Asylbek – byltyr Taılandta ótken Azııa chempıonatynyń fınaldyq aı­qasynda fılıppındik boks­shyny utyp, qurlyq jeńimpazy atanǵan sańlaq. Júlde alady dep úmit artqan serkemizdiń biri 60 kg salmaqta baq synaǵan Talǵat Syrymbetov edi. Ol da alǵashqy aınalymnan asa almaı, brazılııalyq Lýız Olıveıraǵa ese jiberdi. Almat Ábdýáli de (65 kg) Brazılııa boksshysy Iýrı Reıes Falkaonyń sheńgelinen shyǵa almady. Tóreshiler brazılııalyq boksshyǵa basym upaı jazdy. Eger Almat shırek fınalǵa shyqqanda, Parıj Olımpıadasynyń chempıo­ny, ózbekstandyq Asahýdja Mýıdınhýdjaevpen sheberlik baıqasatyn edi. 70 kg salmaqta tartysqa túsken Darhan Dúısebaı da shırek fınaldyq aıqastan bas­tap, biraq fransýz boksshysy Makan Traorege ese jiberdi. 80 kg salmaq dárejesinde Dıas Molji­gitov polıak boksshysy Nıkoden Kozakty erkin eńserdi. Jartylaı fınaldyq aıqasta endi Azııa chempıony, ózbekstandyq Javohır Ýmmatalıevke qarsy aıqasady. О́zbek boksshysy shırek fınalda álem chempıony, amerıkalyq Robbı Gonzalesti yǵystyrdy. Dáýlet Tólemisovke de (85 kg) jerebe sátti tústi. Bul salmaqta 7 boksshy ǵana bolǵandyqtan, jerlesimiz birden jartylaı fınaldyq tartysta baq synaıdy. Qarsylasy fransýz Abdýlaıe Traore men úndistandyq Jýngo Jýngo jekpe-jeginde anyqtaldy. Eki serkeniń aıqasynda tóreshiler Fransııa boksshysyn jeńimpaz dep tanydy.

90 kg salmaqta Danııal Sapar­baı jazǵy Azııa oıyndarynyń qola júldegeri úndistandyq Na­rendard aıqyn utyp, jar­tylaı fınalǵa shyqty. Endi ózbekstandyq Jahongır Zokı­rovke qarsy saıysqa túsedi. Jastar arasynda álem chempıony, Azııa birinshiliginiń eki dúrkin je­ńimpazy, kásipqoı boksta da baǵyn synap kórgen ózbek boks­shysy ońaı qarsylas emes.

Qyzdar arasyndaǵy tartysta eki boksshymyz álem kýboginiń altyn medalinen úmitti. Jazıra Oraqbaeva (51 kg) Brazılııa sportshysy Karolın Almeıdany yǵystyryp, jartylaı fınalǵa ótti. Endi Polsha boksshysy Natalıa Kýjevskanyń qarymyn baıqap kóredi. 54 kg salmaqta baǵyn synaǵan Anıta Ádisheva polıak boks­shysy Vıktorııa Roga­lınskaǵa ese jiberip, alǵashqy ke­zeńnen aspady. 57 kg salmaqta Uljan Sársenbek Polshanyń úmitin arqalap kelgen Iýlııa Sheremetaǵa qarsy aıqasqa túsedi.

World Boxing halyqaralyq uıymy álem kýboginiń ekinshi kezeńin jaz mezgilinde Astana qalasynda uıymdastyrmaq.