Kórmede Gınnesstiń rekordtar kitabyna engen «Baısary» atty asyl tuqymdy qoı tuqymy kópshilik nazaryna usynyldy. Ettiligimen erekshelenetin «Baısary» tuqymdy eń úlken qoshqardyń salmaǵy – 231 keli. Halyqaralyq kórmeniń ashylý saltanatyna oblys ákiminiń orynbasary Ertaı Altaev ıgi isti uıymdastyrýshylar men mal basyn asyldandyrý baǵytynda eńbek etip jatqan sharýalarǵa sáttilik tilep, alǵysyn bildirdi.
«Oblysta asyl tuqymdy qoı sanynyń úlesi 13 paıyzdy quraıdy nemese 581,4 myń bas. Asyl tuqymdy mártebesi bar 850 birlik agroqurylym jumys isteıdi. Sońǵy 10 jylda mal sharýashylyǵy salasynda sanǵa emes sapaǵa mán berile bastady. Mal tuqymyn asyldandyryp, dástúrli sharýashylyqtan zamanaýı mal baǵý tásiline kóshken, qojalyqtardyń tabysy eselenip, áleýeti arta tústi», dedi oblys ákiminiń orynbasary.
Is-shara aıasynda etti-maıly qoı tuqymynyń «Eń aýyr salmaqty», «Boı bıiktigi», «Syrtqy eksterer» atalymdary boıynsha baıqaýlar ótti. Nátıjesinde 45 nomınasııanyń jeńimpazdary anyqtalyp, qazylar alqasynyń sheshimimen úzdik qoshqar ıelerine motosıkl, teledıdar, tońazytqysh jáne kýboktar tabystaldy. Jalpy júlde qory – 30 000 AQSh dollary.
