«Biz salyqtardy, tólemder men alymdardy azaıtamyz. Bul salyqtyq ákimshilendirýdi jeńildetip qana qoımaı, ýaqytty únemdeıtin qadam, sonymen qatar kompanııalarǵa óz damýyna kóbirek resýrstar baǵyttaýǵa múmkindik beredi», dep atap ótti vıse-premer.
Reformalar sheńberinde salyqtardyń jalpy sany 12-den 11-ge deıin qysqarady – biryńǵaı jer salyǵyn jeke tabys salyǵynyń (JTS) quramyna engizý usynylady. Tólemderdiń 10 túrinen – jarnama ornalastyrǵany jáne lısenzııalardy paıdalanǵany úshin 2 tólem túri alynyp tastalady.
«Sonymen qatar 3 tólem: sý resýrstaryn, orman jáne janýarlar álemin paıdalaný úshin – tabıǵı resýrstardy paıdalanǵany úshin biryńǵaı tólemge biriktiriledi», dep túsindirdi Serik Jumanǵarın.
Onyń aıtýynsha, mólshermeler sany 77-ge, 373-ten 296-ǵa deıin qysqarady. Barlyq tólemder sany 10-nan 6-ǵa deıin azaıady.
Sondaı-aq Serik Jumanǵarın ózgerister alymdarǵa áser etetinin aıtty. Úkimet 34 mólsherlemeni alyp tastap, alymdardyń 6 túrin qysqartýdy usynady. Onyń ishinde dárilik zattar men medısınalyq buıymdardy, ǵarysh obektilerin tirkeý jáne qaıta tirkeý, jyljymaly múlik kepili jáne keme ıpotekasy, BAQ-ty esepke qoıý, qarjy naryǵyna qatysýshylarǵa ruqsat berý, sondaı-aq radıojıilik spektrin paıdalaný úshin alymdardy alyp tastaý bar. Mólsherlemeler sanyn 310-nan 276-ǵa deıin azaıtý usynylyp otyr.
Memlekettik bajdar týraly aıtatyn bolsaq, jańa Salyq kodeksiniń jobasynda bajdardyń 5 túrin alyp tastaý jáne mólsherlemeler sanyn 113-ten 62-ge (-51) deıin qysqartý usynylady.
Onyń ishinde zııatkerlik menshik salasyndaǵy is-áreketteri, notarıattyq is-áreketteri, sondaı-aq halyqaralyq tasymaldarǵa arnalǵan qujattar, teńiz kýálikteri jáne janýarlar men ósimdikterdi tasymaldaýǵa arnalǵan ruqsattar bergeni úshin bajdardyń kúshin joıý usynylýda.
Serik Jumanǵarın iske asyrylyp jatqan sharalar salyq júıesin neǵurlym ashyq, tıimdi jáne bıznes qajettilikterine baǵdarlanǵan etýge múmkindik beretinin atap ótti.
