«Jumysshy mamandyqtar jyly» aıasynda ótetin spartakıadada elimizdiń 20 óńiriniń kolledjderinen kelgen 2 myńǵa jýyq stýdent baq synaıdy. «Túrkistan arena» stadıonynda ótken spartakıadanyń ashylý saltanatynda Oqý-aǵartý mınıstri Ǵanı Beısembaev pen Túrkistan oblysynyń ákimi Nuralhan Kósherov quttyqtaý sóz sóılep, sportshylarǵa sáttilik tiledi. «Qazirgi tańda tehnıkalyq jáne kásiptik bilim berý júıesin transformasııalaý baǵytynda úlken jumystar júrgizilip jatyr. 2025 jylǵy 1 qyrkúıekten bastap jan basyna shaqqandaǵy qarjylandyrý kólemi eki esege ósedi. Bul kolledjderdiń materıaldyq-tehnıkalyq bazasyn jaqsartýǵa, pedagogtardyń biliktiligin arttyrýǵa múmkindik beredi. Búgingi «Eńbek kýbogi» spartakıadasy sizderge tek sporttyq jiger men rýh berip qana qoımaı, eńbekke degen jańa kózqaras qalyptastyrady dep senemin», dedi Ǵanı Beısembaev.
Túrkistan oblysy iri sporttyq dodalardy qabyldaýǵa daıyn ekenin jetkizgen Nuralhan Kósherov óńirde tehnıkalyq jáne kásiptik bilim berý salasynda jańa josparlar baryn atap ótti. «Qazirgi tańda 50 kolledjde 45 myńnan astam stýdent bilim alýda. Bıyl kolledjderge 15 myńnan astam grant bólýdemiz. Oqý baǵdarlamasyn naryq talabyna saı beıimdeımiz. Atalǵan baǵytta jańadan 11 jumysshy mamandyǵyna lısenzııa alynady. Túrkistan – tarıhı orda! El Prezıdenti bul qalaǵa erekshe mártebe berip, damýyna turaqty kóńil bólýde. Qasıetti shaharda respýblıkalyq spartakıadanyń ótýi zańdylyq. Sebebi Túrkistan – eńbek adamdarymen maqtanatyn óńir. Oblysta «О́ńirlik jumyspen qamtý kartasy» boıynsha 130 myńnan astam jańa jumys orny ashylady. Onyń 60 paıyzy jumysshy mamandyqtarǵa arnalǵan. Aımaqta jańa zaýyttar men óndiris oryndary ashylýda. Jastardy shaqyramyz», dedi oblys ákimi. Sondaı-aq Nuralhan Kósherov «Eńbek kýbogi» spartakıadasy nátıjesinde úzdik stýdentterge Qoja Ahmet Iаsaýı atyndaǵy halyqaralyq qazaq-túrik ýnıversıteti bilim grantyn taǵaıyndaıtynyn jetkizdi. Birqatar jetekshi kásiporyndar spartıakıada jeńimpazdary úshin arnaıy sertıfıkattar tabystap, jumysqa qabyldaıdy.
Spartakıada baǵdarlamasyna basketbol, shaǵyn fýtbol, fýtzal, toǵyzqumalaq, shahmat, ústel tennısi jáne voleıbol syndy sport túrleri engizilgen.
TÚRKISTAN
