Qazaq ádebıeti men mádenıetin damytýda jemisti eńbek etip kele jatqan sóz sheberi Á.Qaıyrbekovtiń ómiri men shyǵarmashylyǵyn nasıhattaýdy maqsat tutqan is-sharany jýrnalıst, belgili qoǵam qaıratkeri Ámirjan Qosan júrgizip otyrdy. 22 jyl qazaq baspasózinde jan-jaqty tanylyp, shırek ǵasyr boıy qazaq ádebıetiniń klassıkteri Sábıt Muqanov pen Ǵabıt Músirepov mýzeı keshenin basqaryp kelgen aqynnyń rýhanııatqa sińirgen eńbegin laıyqty baǵalap, quttyqtaý hatyn joldaǵan Memleket basshysy Qasym-Jomart Toqaevtyń lebizin Almaty qalasy ákiminiń orynbasary Azamat Qaldybekov oqyp berdi. «Siz qazaq ádebıetinde ózindik qoltańbasymen tanylǵan belgili aqynsyz. Shoqtyǵy bıik shyǵarmalaryńyz ben týyndylaryńyz ult rýhanııatyn baıytýǵa qyzmet etip jatyr. Ǵylymı zertteý jumysyn júrgizýge atsalysyp, buqaralyq aqparat quraldarynyń damýyna úles qostyńyz. Sizdi 70 jasqa tolǵan mereıtoıyńyzben quttyqtaı otyryp, kóp jyldyq qajyrly eńbegińiz úshin alǵysymdy bildiremin» delingen el Prezıdentiniń quttyqtaý hatynda. Shahar ákiminiń orynbasary Azamat Beskempiruly qazaq ádebıetiniń órisin keńeıtip, oqyrmanyna kórkem ári kesek dúnıeler usynyp kele jatqan baısaldy qalam ıesin tósbelgimen marapattady. Sondaı-aq bar sanaly ǵumyryn ádebıetke arnaǵan qarymdy qalamger, ádebıet zertteýshisi, tájirıbeli synshy, daryndy aýdarmashyny quttyqtaǵan Mádenıet jáne aqparat mınıstri Aıda Balaeva men Abaı oblysynyń ákimi Berik Ýálıdiń de yqylasy hattary arqyly mereıtoı ıesine jetkizildi.
Poezııa – jýrnalıstıka – ǵylym. Bul úshtaǵan – Ádilǵazy Qaıyrbekov shyǵarmashylyǵynyń adastyrmas shamshyraǵy, buljymas baǵdary. Ádebı jıynda sóz alǵan Ádebıet jáne óner ınstıtýtynyń dırektory Kenjehan Matyjanov, «Qazaq ádebıeti» gazetiniń bas redaktory Baýyrjan Jaqyp, fılologııa ǵylymdarynyń doktorlary Qanseıit Ábdezuly, Nurdáýlet Aqysh, sýretshi Erkin Nurazhan, belgili jýrnalıst Qaınar Oljaı rýhanııat sardarynyń azamattyq bolmysy, qalamgerlik kelbeti men tulǵalyq qasıetin ár taraptan zerdelep, tarqatyp jatty. Aqynnyń ánge áýestigin, beımálim bolyp kelgen sazgerlik qyryn belgili ánshi Erkin Shúkiman oryndaǵan «Án-ǵumyr» áni áıgiledi.
Eńbek jolyn S.Muqanovtyń ádebı-memorıaldyq mýzeı-úıiniń tuńǵysh ekskýrsııa júrgizýshisi bolyp bastaǵan Á.Qaıyrbekov keıin túrli aqparat quraldarynda eńbek etip, ásirese ádebıet, mádenıet, óner taqyryptaryna kóbirek qalam tartty. «Ár maqalasy ýaqyt shańyna kómilip qalmaı, búginde qaıtalap oqýǵa jeteleýiniń bir syry bir kúndik emes, ózekti, máńgilik máselelerdi, ult múddesin, halyq kókeıindegi oılardy qaýzaǵanynda dep bilemiz», deıdi moderator Á.Qosan.
«Ádilǵazy – lırık aqyn. Biraq lırıkasynyń arǵy jaǵynda úlken fılosofııalyq oı jatady. Aqyn jan-jaqty bilimdi bolmasa, jalǵyz talant azdyq etedi. Ádilǵazy jasynan bilim qýyp keledi. Aqynnyń ensıklopedııalyq biliminiń arqasynda Sábıt Muqanov pen Ǵabıt Músirepovtiń ómiri men shyǵarmashylyǵyn qamtyǵan qanshama eńbek, maqalalar jaryq kórdi. Músirepovtiń ómir jolynyń derekterin, shyǵarmalarynyń jazylý tarıhyn, hattaryn jınaqtap, klassık týraly ensıklopedııa qurastyryp shyǵarý – ol týraly tereń biletin adamnyń ǵana qolynan keletin is. M.Áýezovtiń mýzeı úıinen keıingi keńestik kezeńde jasaqtalǵan mýzeılerdiń biri de biregeıi S.Muqanov pen Ǵ.Músirepovtiń memorıaldy keshenine Ádilǵazynyń dırektor bolýy, sol qarashańyraqta talmaı, mańdaı terin sypyryp qyzmet etýi mýzeı mereıin ústem ete tústi», deıdi Mereke Qulkenov.
Á.Qaıyrbekov ádebıetimizdiń bıik tulǵalary S.Muqanov pen Ǵ.Músirepovtiń ómiri men shyǵarmashylyǵyna qatysty 50-den asa kitaptyń alǵysózin jazǵan, qurastyrýshysy, redaktory, redaksııa alqasynyń múshesi boldy jáne qos klassıkke baılanysty 50-den asa halyqaralyq, respýblıkalyq ǵylymı konferensııalarda baıandama jasaǵan. Aqynnyń benefısinde «Ádilǵazynyń ádemi álemi» atty beınebaıan kórsetildi. Aqyn alpys jasynda ontomdyq shyǵarmalar jınaǵyn shyǵarsa, 70 jasynda úsh kitabymen oqyrmany aldynda esep berip otyr. Belgili qalamgerler, ádebıet zertteýshileri, mýzeı qyzmetkerleri qatysqan benefıste «Ǵazalǵumyr», «Kók dápter» maqalalar jınaǵy men «Bıblıografııalyq kórsetkish» sııaqty jańa kitaptarynyń jibekbaýy kesilip, kitaphanaǵa tartý etildi.
ALMATY
