Sýretti túsirgen – Erlan OMAR, «EQ»
О́tken 30 jylda qanjyǵamyz biraz oljamen maılandy. Aldymen, QHA óskeleń urpaqqa áleýmettik turǵyda demeý boldy, damýǵa qanat bitirdi. Bul alańda memlekettik jáne qoǵamdyq qyzmette, óner men shyǵarmashylyqta, sondaı-aq bızneste juldyzy janǵan jastar tulǵa retinde jetile bastady.
Búginde jastar qaýymy – Qazaqstan halqy Assambleıasynyń basty qozǵaýshy kúshteriniń biri hám kelbeti. Olar volonterlik qyzmetten ǵylymı zertteýlerge deıingi barlyq baǵytta damý satysyn qalyptastyra bildi. Memleket basshysy Qasym-Jomart Toqaevtyń reformalary men ózgeristerin iske asyrýda da jastardyń úlesi aıryqsha.
QHA úsh onjyldyqta adam kapıtalyn damytýmen turaqty aınalysty. Memlekettik tildi keńinen nasıhattaýǵa, qaıyrymdylyq, volonterlik, ınvestısııa tartý, medıasııa, dıplomatııa, ǵylymı-zertteý, aǵartýshylyq jáne tárbıelik baǵyttarda nátıjeli jumys istep keledi. Bul rette «Assambleıa jastarynyń» da orny erek.
Elimizdiń 10 myńnan asa belsendisin bir arnada toǵystyrǵan biregeı jastar uıymynyń 20 óńirlik bólimshesi bar. Etnos ókilderi tyǵyz ornalasqan aımaqtarda, ıaǵnı monoqalalar men aýyldyq jerlerde uıymnyń jeke bólimderin qurýǵa kúsh salyp jatyrmyz. Ázirge Rıdder men Temirtaý qalasynan jáne Qordaı aýdanynan ashyldy. Mundaǵy maqsat – aımaqtarmen tyǵyz qarym-qatynas ornatyp, eldi mekenderdiń jastarymen tikeleı jumys isteý, olardyń ózin damytýyna yqpaldasý.
Dástúrli jobalarymyzdyń ishinde memlekettik tildi etnosaralyq qarym-qatynas tili retinde damytýǵa aıryqsha kóńil bólinedi. Tipti keıingi 30 jylda qazaqsha shúıirkelesken ózge etnos ókilderin kórý qalypty qubylysqa aınaldy. Bul rette QHA ókilderi men uıym belsendileriniń áleýmettik jelilerdegi ınteraktıvti jobalary serpin berdi. Olga Spırına, Alına Kan, Oksana Nabıeva, Anastasııa Ýlchenko, Aleksandra Myskına sekildi jastarymyz kópshilikke úlgi.
Máselen, jýrnalıst Aleksandra Myskına bastaǵan «Úıde sóıle» jobasy – úıden shyqpaı-aq, qazaq tilin úıretetin taptyrmas qural. Joba Astana, Almaty, Petropavl, Pavlodar qalalarynda sátti iske asyryldy.
Buǵan qosa IT, kásipkerlik pen áleýmettik jobalarǵa qatysty jastar bastamalaryn qoldaýǵa da basymdyq beremiz. Byltyr jas belsendilerimiz «Kóshbasshylar mektebi» jobasy aıasynda kommýnıkasııa qurý, kópshilik aldynda sóıleý, basqarý, qoǵammen jumys isteý sekildi daǵdylardy úırendi. Osylaısha, biz qoǵamdyq-saıası salaǵa daıyn, bilikti jas mamandardy daıarlaýdy kózdedik.
Jastarmen jumys isteýdiń jańa túri – Stýdenttik assambleıalar jelisin qurý. Bastama byltyr aıaq alyp, 50-den asa joǵary oqý orny men kolledjde stýdenttik ózin-ózi basqarý uıymdary quryldy. Qýantatyny sol, jobany jastardyń ózderi joǵary ynta-yqylaspen qabyldady. Abaı, Atyraý, Shyǵys Qazaqstan, Mańǵystaý oblystaryndaǵy uıymdar birden jumysqa kiristi. Orta naǵyz shyǵarmashylyq alańǵa aınalyp, el ıgiligi jolyndaǵy jaqsy ıdeıalar iske asady dep senemiz.
Ekinshi jyl qatarynan ótip jatqan «Folk&Art Performance» jobamyz túrli etnos ókilderiniń mádenıet salasyna tıgizgen yqpalyn kórsetýge baǵyttalǵan. Joba aıasynda shyǵarmashyl jastar úshin jol júrý granttary bólindi. О́nerli ul-qyzdarymyz halyqaralyq baıqaýlarǵa qatysyp, elimizdiń kók baıraǵyn shetelderde asqaqtata alady.
Uıym volonterlik qyzmette de belsendi. Eldegi tótenshe jaǵdaılar kezinde Assambleıa eriktileri jumyldyrylyp, alǵashqylardyń biri bolyp otandastarymyzǵa kómek kórsetti. Mysaly, byltyr sý tasqyny tusynda QHA-nyń «Júrekten júrekke» atty aýqymdy aksııasyn iske asyrýǵa 12 myńnan asa belsendi erikti tartyldy. Bul jumys QHA XXXIII sessııasy aıasynda Prezıdenttiń joǵary baǵasyna ıe boldy.
«Assambleıa jastary» uıymynyń halyqaralyq baılanysty belsendi ornatqany da – aýyz toltyryp aıtarlyqtaı jaıt. Jastarymyzdyń tájirıbesi Andorra, Belgııa, Germanııa, Úndistan, Qyrǵyzstan, Reseı, Tájikstan, Túrikmenstan, О́zbekstan, Fransııa elderinde jáne IýNESKO men Eýropa keńesi syndy halyqaralyq alańdarda tanystyrylǵanyn maqtanyshpen jetkize alamyn.
Bıyl mamyr aıynda Qazaqstan halqy Assambleıasynyń jastary IýNESKO-nyń Parıjdegi shtab-páterine baryp, elimizdiń úzdik jobalaryn álemge pash etedi. Biz árqashan qoǵamdyq dıplomatııany damytýǵa asa mán beremiz. О́ıtkeni jas kóshbasshylar arasyndaǵy baılanys elder arasyndaǵy dostyqty nyǵaıta túsedi.
Memleket basshysy «Ana tili» gazetine bergen suhbatynda «Bizdiń patrıotızmimiz naqty ispen kórinýi kerek» degen edi. Mine, «Assambleıa jastary» uıymy osy baǵytta kún saıyn ter tógip keledi. Jastarymyz tatýlyq pen kelisimdi nyǵaıtý jolynda jiger jumsap, jasampazdyq pen jańashyldyqtyń sán-saltanat qurýyna atsalysyp jatyr.
Tımýr JUMYRBAEV,
«Assambleıa jastary» RQB tóraǵasy
