Aımaq basshysy óńirdegi jumys saparyn shalǵaı shatqan Emeltaý aýylynan bastady. Ondaǵy mektep, jol, ınternet máselesi kezeń-kezeńimen sheshiletin boldy. Budan keıin oblys ákimi Baıqoshqar aýylyna baryp, aýyl turǵyndarynyń usynys-pikirlerin tyńdady. Aýyl turǵyndarynyń aıtýynsha, bul aýylǵa buryn-sońdy oblys ákimi múlde barmaǵan. Oblys ákimniń arnaıy at basyn buryp, aýyl halqynyń jaǵdaıymen tanysqanyna olar rızashylyqtaryn bildirdi. Sondaı-aq olar aýylda aýyzsý máselesi baryn jetkizdi. Aımaq basshysy bul másele bıyl kúzge deıin sheshiletinin aıtty.
Budan soń aımaq ákimi burynǵy aýdan ortalyǵy bolǵan Barshatas aýylynyń aqsaqaldarymen jáne aýyl belsendilerimen jolyqty. Olardyń aıtýynsha, 30 jyl qaraýsyz qalǵan aýdannyń halqy jan-jaqqa bosyp, eldi mekenniń toz-tozy shyqqan. Máselen, aýyl aqsaqaly Yrǵyzbaı Sıqymbaevtyń aıtýynsha, aýdan qaıta qurylmaı, eldi meken ońala qoıýy qıyn.
«Arnaıy aýylymyzǵa at basyn burǵanyńyzǵa alǵys aıtamyz. О́zińiz bilesiz, kezinde Shubartaý aýdany – Semeı oblysy kezinde úlken aýdannyń biri boldy. Jer kólemi jaǵynan birinshi oryndy alatyn. Ol kezde 19 myńdaı halqy bolǵan. Basqasyn aıtpaǵanda, 450 myńnan astam qoı men 12-13 myń jylqysy bar edi. Aýyl sharýashylyǵy dúrkirep turdy. Keıin aýdandy taratyp, Aıagózge qosty. Aýdan taraǵan soń, mekemeler jabyldy. Jastar jumyssyz qaldy. Sóıtip bári anda-munda ketti. Al Abaı oblysy aýyl sharýashylyǵyna baǵyttalǵan óńir. Keleshekte aýyl sharýashylyǵyn damytatyn bolsaq, múmkin shekaralyq aýdandar sııaqty, buryn taratyp jibergen aýdandardy qaıta quryp, jumysyn jandandyrýdyń múmkindigi bolyp qalatyn shyǵar», dedi aýyl aqsaqaly.
Qarııanyń aıtýynsha, aýdan qaıta qalpyna kelse, eldi mekenniń tirshiligi jańǵyryp, tútini tik ushar edi.
«Shubartaý – mal sharýashylyǵymen qatar, ken óndirisi de damyp kele jatqan óńir. Qazirdiń ózinde bes ken orny bar. Osydan 25 shaqyrym jerde «Sarybulaq» ken orny ashylyp jatyr. Taǵy eki-úsh ken orny ashylady degen boljam bar. Aýdan ashylsa, halyq ta jan-jaqqa kóshýin toqtatyp, týǵan jerge turaqtar edi. Eger osy kúıi qaraýsyz qala berse, bir kúni jerimiz qańyrap bos qala ma degen qorqamyz», dedi Barshatas aýylynyń qoǵamdyq keńesiniń múshesi Qaıyrjan Nursıpatov.
Aımaq basshysy bul máselege qatysty halyq sanynyń mańyzdylyǵyn eskertti.
«Árıne, jeke aýdan bolǵan jaqsy. Osy eldiń janashyr azamattary retinde bul máseleni kóterýlerińiz oryndy. Biraq bilesizder, bul halyq sanyna baılanysty másele. Mysaly, qazir Shubartaý óńirinde 6 jarym myń adam qalǵan. Másele, Memleket basshysynyń uıǵarymymen Qytaı elimen shekaralas Maqanshy aýdany qaıta quryldy. Ondaǵy halyq sany 20 myń boldy. Sonymen qatar ol jerde Alakól demalys orny, «Baqty» keden beketi jáne mal sharýashylyǵy bar, osy jaıttyń bári eskerilip, aýdan qaıta ashyldy. Biraq usynystaryńyz qaperimizde bolady, joǵaryǵa jetkizemiz», dedi aımaq ákimi.
Al jalpy Shubartaý óńiriniń eń birinshi jan aıqaıy – jol máselesi bolyp otyr. Muny aýyl aqsaqaldary da, qoǵam belsendileri de jetkizdi. Buǵan qatysy «QazAvtojol» ulttyq kompanııasynyń óńirge jaýapty ókilderi jaýap berdi. Olardyń málimdeýinshe, Aıagóz ben Barshatas arasyna jol salý jumystary bastaldy. Bul jumys 2027 jylǵa deıin tolyq aıaqtalady.
«Byltyr Barshatas pen Malgeldi aýyldary arasyndaǵy joldyń 10 shaqyrymyna asfalt tóselgen. Bıyl osy joldyń 30 shaqyrymy ortasha jóndeýden ótedi», deıdi olar.
Jergilikti turǵyndar oblys ákimine byltyr jasalǵan joldy júk kólikteri búldirip jatqanyn jetkizdi. «Qaraǵandy-Aıagóz-Tarbaǵataı-Boǵas» jolymen Shubartaý óńiriniń 7 myńǵa jýyq halqy qatynaıtynyn aıtyp, joldyń búgingi jaǵdaıyna alańdaýshylyqtaryn bildirdi.
Aımaq basshysy Shubartaý óńiriniń jol máselesin jaqsy biletinin jetkizdi.
«Búgin osy joldyń jaǵdaıyn kóreıin dep arnaıy keldim. Bıyl bul kúre joldyń eki ýchaskesine asfalt tóseledi. Buǵan respýblıkalyq bıýdjetten qarjy bólingen. Bul jumys kelesi jyly da jalǵasady. Shubartaý óńirindegi joldardyń jaǵdaıyn jaqsartý jeke baqylaýymda bolady» dedi oblys ákimi.
Abaı oblysy,
Barshatas aýyly
