Sýretti túsirgen – Erlan OMAR, «EQ»
Kitap kórmesine Qazaqstan, Qytaı, Reseı, Túrkııa, Iran, Ispanııa, Portýgalııa, О́zbekstan elderinen baspa, kitap satý, tanymdyq-ǵylymı bilim berý jáne polıgrafııalyq ónimderin usynatyn 70-ke jýyq kompanııa qatysady.
Mádenı-rýhanı jobanyń negizgi maqsaty – balalar men jasóspirimderdi kitap oqýǵa baýlý, otbasymen birge kitap oqýdy nasıhattaý, jastardyń oqyrmandyq talǵamyn qalyptastyrý, oqyrmanǵa jetekshi baspalardyń kitap ónimderiniń eń jaqsy zamanaýı ónimin usyný, álemdik kitap shyǵarý jáne baspa ındýstrııasynyń tájirıbesimen almasý, álemdik baspalarmen baılanys ornatý jáne baspa isindegi jetistikterdi kórsetý bolyp otyr.
«Astana Eurasian Book Fair – 2025» halyqaralyq kitap kórme-jármeńkesi eresekterge de, balalarǵa da birdeı qyzyqty bolatyn bes kúndik mádenı-iskerlik baǵdarlamadan turady. Kórme qonaqtary men qatysýshylaryn jetekshi otandyq jáne sheteldik baspalardan shyqqan balalar ádebıeti, kórkem ádebıet, ǵylymı-tanymdyq ádebıetterdiń tusaýkeseri, belgili aqyn-jazýshylarmen qoltańba-sessııalar, kitap shyǵarýdyń ózekti máseleleri talqylanatyn dóńgelek ústelder kútedi. Bes kúndik kórmede kún saıyn oıyn alańynda kitap oqý, sheberlik synyptary, qundy syılyqtar utysy, taǵy basqa da qyzyqty is-sharalar ótkiziledi.
Sondaı-aq kórme aıasynda dástúrli túrde «Jyldyń úzdik kitaby» baıqaýy «Jyl kitaby», «Úzdik debıýt», «Úzdik kórkem ádebıet», «Non-fıkshn janryndaǵy úzdik kitap», «TÚRKSOI»-dyń Gran-prıi» atalymdary boıynsha ótedi.
Aıta keteıik, kitap kórmesin dástúrli túrde «Folıant» baspasy uıymdastyryp keledi. Jármeńke 27 sáýirge deıin jalǵasady. Kirý – tegin.
