Kúni keshe elimiz úshin asa mańyzdy óndiristik jobalardyń biri – «Sastóbe ınnovasııalyq kesheniniń» birinshi kezeńiniń qondyrǵylardy ornatý jumystary bastaldy. «Saýts-Oıl» kompanııasy qolǵa alyp otyrǵan bul keshen iske qosylǵanda elimizdegi eń iri ák óndirýshi bolady. Atalǵan óndiris ishki naryqty sapaly ónimmen qamtamasyz etýge ǵana emes, eksporttyq áleýetti de aıtarlyqtaı arttyrýǵa múmkindik beredi.
Oblys ákimi Nuralhan Kósherovtiń qurylys alańynda ınvestorlarmen kezdesýinde Túlkibas aýdany aýmaǵyndaǵy «Sastóbe» ınnovasııalyq kesheni» JShS jobasyna «2021-2025 jyldarǵa arnalǵan kásipkerlikti damytý jónindegi» ulttyq jobasy aıasynda qoldaý kórsetilip, jobalaý-smetalyq qujattamalary ázirlengeni aıtyldy. Joba ekologııalyq standarttarǵa saı zamanaýı tehnologııamen júzege asatyny, bul – iri óndiris ornynan kútiletin basty talaptardyń biri ekeni de jetkizildi.
Kelesi jyly iske qosylatyn zaýytta jylyna 400 myń tonna ák, 200 myń tonna kalsıı karbıdin, 100 myń tonna kaýstıkalyq soda, 120 myń tonna polıvınılhlorıd jáne 1 mln tonna sement óndirý josparlanyp otyr. Qurylys, hımııa, metallýrgııa sekildi ónerkásiptiń kóptegen salalaryna serpin beretin joba aıasynda myńǵa jýyq jumys orny ashylady.
