foto: Joǵarǵy sot
Sot barysynda aıyptalýshy Darhan Áskentaıdyń synyptasy men tanystary kýálik etti. Synyptastarynyń aıtýynsha, Darhan sabyrly, eshqashan janjal shyǵarmaıtyn, tóbeleske beıim emes adam retinde sıpattalady. Al 31 jastaǵy Erkebulan Toqtarbaı oqıǵa bolǵan kúni Darhanmen birge bolǵanyn aıtty. Onyń sózinshe, olar gaz qondyrǵysyn jóndeý úshin kezdesip, keıin Darhan dúkennen syra ákelip, Aıdyn esimdi tanysymen ishken. Erkebulannyń aıtýynsha, olar ishkenimen, mas bolmaǵan.
Sondaı-aq Erkebulan Darhandy dúken mańynda qaldyryp ketkenin jáne kólikte otyrǵan kezde Darhan bireýden aqsha suraǵanyn, oǵan kómekteskenin jetkizdi. Bolǵan jaǵdaı týraly ol tek kelesi kúni áleýmettik jeliden bilgenin málimdedi.
Qorǵaýshylar kýágerlerden Darhan Áskentaıdyń buǵan deıin uqsas oqıǵalarǵa qatysy bar-joǵyn surastyrdy. Alaıda kýágerler mundaı faktiler týraly bilmeıtinin aıtty. Belgili bolǵandaı, Darhan oqıǵa aldynda Qarjaýbaıdyń dúkeninen syra satyp alǵan. Buǵan deıin de onyń ústinen qylmystyq is qozǵalǵanymen, sotqa jetpeı toqtatylǵan. Qazirgi ýaqytta onyń resmı sottylyǵy joq.
Is boıynsha sot otyrystary jalǵasýda.
