Top ishindegi ońtaılandyrý: búgingi ahýal qandaı?
Ońtaılandyrý jumysynyń naqty mysalynyń biri – «KEGOC» AQ 100% enshiles uıymy bolyp sanalatyn «Energoınform» AQ kompanııasyn qaıta qurylymdaý týraly sheshimi boldy. Osylaısha, kompanııany KEGOC quramyna engizý josparlanyp otyr. Bul óz kezeginde basqarý qurylymyn jeńildetip, energetıka sektory jumysynyń tıimdiligin arttyrýǵa múmkindik beredi.
«Energoınform» AQ aqparattyq-telekommýnıkasııalyq júıeni damytýmen aınalysady jáne energetıka salasyndaǵy kásiporyndarda aqparattyq júıelerdi basqarý men apparattyq-baǵdarlamalyq keshenderdi avtomattandyrý jáne sıfrlandyrýǵa qatysty jobalardy júzege asyrady.
«Bul kompanııa men barsha qyzmetkerler, seriktester úshin mańyzdy sheshim boldy. Kez kelgen ózgeris qyzmetkerler men barlyq taraptyń múddelerin barynsha eskere otyryp engiziletinine senimdimiz», – dep atap ótti «KEGOC» basshysy Nábı Aıtjanov.
Bul rette, «KEGOC» iri ınfraqurylymdyq jobalardy júzege asyrý jumysyn jalǵastyryp jatyr. Olardyń arasynda Qazaqstannyń BEJ-niń Ońtústik aımaǵynyń elektr energetıkalyq júıesin kúsheıtý men Batys aımaqty elimizdiń BEJ-simen biriktirý bastamasy bar. Eki joba da 2027 jyly aıaqtalady dep josparlanyp otyr.
Beıindi emes qurylymdardy taratý jumysy qatar júredi
Buǵan deıin «Samuryq-Qazyna» qorynyń ókilderi «Samuryq-Qazyna Bıznes Servıs» JShS-in taratý jospary týraly málimdegen edi. Bul kompanııa servıstik qyzmetterdi usyný maqsatynda qurylǵan-dy.
«Samuryq-Qazyna» AQ basqarma tóraǵasy Nurlan Jaqypov qor aktıvter qunyn arttyrý, beıindi emes uıymdardy taratý jáne naryqqa qaraı ıkemdelip, baǵdarlanǵan qurylymdy qalyptastyrý boıynsha jumystardy jalǵastyryp jatqanyn atap ótken edi.
Ekonomıkany lıberalızasııalaý baǵdary
Mundaı qadamdardyń barlyǵy Prezıdent Qasym-Jomart Toqaev belgilegen jalpy strategııanyń bir bóligi bolyp sanalady. Ekonomıkany lıberalızasııalaý baǵdary memlekettiń bıznestegi úlesin kezeń-kezeńimen azaıtyp, birqatar fýnksııalardy jeke sektorǵa berýdi kózdeıdi. Bul tıimdi basqarýdy kúsheıtýge, básekelestikti arttyrýǵa jáne otandyq kásipkerler úshin jańa múmkindikter ashyp, sheteldik ınvestorlardyń kelýine qolaıly jaǵdaı jasaýǵa yqpal etýi tıis.
Qazirgi tańda «Samuryq-Qazyna» AQ aktıvteriniń kólemi boıynsha top-25 qataryna kiredi. 2021 jyldan 2024 jylǵa deıingi ortasha jyldyq tabys ósimi 13%-dy, al EBITDA – 5%-dy qurady.
2024 jyly memleket paıdasyna 1,354 trıllıon teńge qarjy aýdaryldy. Bul kórsetkish enshiles kompanııalardan alynǵan dıvıdendter kóleminen 6 ese kóp bolyp otyr.
Negizgi maqsat – basqarýdaǵy aktıvter qunyn arttyryp, tikeleı sheteldik ınvestısııalardy tartý.
Maınur Janaqova
