Foto: egemen.kz/ Qyrmyzy Jumaǵalıqyzy
Májilistiń baspasóz qyzmetiniń málimetinshe májilis otyrysynda medısınalyq kómektiń biryńǵaı paketin qurý usynylǵan. Atap aıtqanda, Densaýlyq saqtaý mınıstrligine Densaýlyqty qorǵaý memlekettik qory (jedel, shuǵyl, pallıatıvtik kómek, juqpaly jáne áleýmettik mańyzy bar aýrýlardy emdeý) aıasynda medısınalyq kómek kórsetiletin aýrýlardyń tizbesin anyqtaý ókilettigi beriledi.
Sondaı-aq Úkimet alǵashqy medısınalyq-sanıtarlyq kómek aıasyndaǵy qyzmetterdi medısınalyq kómektiń kepildik berilgen kólemi paketinen mindetti medısınalyq saqtandyrý paketine aýystyrýdy usynyp otyr. Mysaly, mamandardy qabyldaý, medısınalyq ońaltý, profılaktıkalyq tekserýler, ımmýndaý, reprodýktıvti densaýlyqty qorǵaý sharalary mindetti medısınalyq saqtandyrý aıasynda qamtamasyz etiledi.
Bul tásildi depýtattyq korpýs qoldamady. Osyǵan oraı depýtattar medısınalyq kómektiń kepildik berilgen kólemi paketinde alǵashqy medısınalyq-sanıtarlyq kómektiń negizgi tizbesin: áleýmettik mańyzy bar aýrýlardyń aldyn alý, dıagnostıkalaý jáne emdeý qyzmetterin saqtaýdy usyndy. Iаǵnı, týberkýlez, AITV, qaterli isik, sozylmaly vırýsty gepatıt, baýyr sırrozy, psıhıkalyq jáne minez-qulyq buzylystary, jedel mıokard ınfarktisi (alǵashqy alty aı ishinde), ınsýlt (bir jyl ishinde), aýtoımmýndyq aýrýlar, epılepsııa jáne basqa da aýrýlarmen aýyratyn adamdarǵa tegin medısınalyq kómektiń tolyq spektrin alýǵa kepildik beriledi.
Sonymen qatar depýtattardyń bastamasymen azamattardyń saqtandyrý mártebesine qaramastan medısınalyq kómekke qoljetimdiligin qamtamasyz etý úshin medısınalyq kómektiń kepildik berilgen kólem paketi aıasynda bastapqy emdeý kezindegi negizgi medısınalyq kómek te saqtalady. Iаǵnı, emhanaǵa kelgen árbir azamatqa dárigerdiń alǵashqy keńesi beriledi degen sóz.
