Qazaq ulttyq qyzdar pedagogıkalyq ýnıversıteti Basqarma tóraǵasy – Rektory Gúlmıra Qanaıdyń aıtýynsha, jekemenshik halyqaralyq mektepter bul máseleni sheshý úshin oqý ordasynyń kómegine júgingen.
«Qazirgi tańda ýnıversıtetimiz Nazarbaev zııatkerlik mektepterimen, 25 jekmenshik mekteppen, 92 memlekettik mekteppen, 32 balabaqshamen, 7 kolledj jáne 96 uıymmen seristestikte jumys isteıdi. Bir jyl buryn Almatydaǵy jekemenshik mektep ýnıversıtetimizden qazaq tili men mádenıetin nasıhattaýǵa qoldaý surady. Seriktestiktiń nátıjesinde ýnıversıtet oqytýshylary men 4 kýrs stýdentteri atalmysh mekteptiń oqýshylary úshin qazaq bıi men ónerine arnalǵan qoıylymdar uıymdastyrýǵa belsene atsalysty. Halyqaralyq mektepterde qazaq mádenıetin tanystyrý – ulttyq bolmysty álemdik bilim keńistiginde dáripteýdiń mańyzdy qadamy. Bul baǵyt Qazaqstannyń tarıhyn, dástúrin, tilin jáne ónerin sheteldik ári jergilikti oqýshylarǵa tanystyryp, ulttyq sana men qurmetti qalyptastyrýǵa baǵyttalǵan», – deıdi Gúlmıra Ámirhanqyzy.
Qazaq mádenıetin ilgeriletý úshin dástúrli merekelerdi – Naýryz meıramy, Dombyra kúnin atap ótý, qazaq ádebıeti men óneri boıynsha arnaıy sabaqtar ótkizý, ulttyq taǵamdar festıvalderi men qolóner kórmelerin uıymdastyrý sekildi is-sharalar keńinen qoldanylýda. Sonymen qatar qazaq tili fakýltatıvterin ashý jáne bilim berý baǵdarlamasyna ulttyq komponentterdi engizý de mańyzdy ról atqarady.
Haileybury Almaty mektebinde ótken Naýryz merekesin joǵary deńgeıde uıymdastyrýǵa QyzPU-dyń Horeografııa jáne art-menedjment kafedrasynyń 3-4 kýrs stýdentteri belsendi qatysty. Stýdentterimiz Adema Sanatova, Dana Samatova, Jaına Amangeldıeva, Janerke Imanbaı, Janel Saken jáne Aıajan Arǵynova ózderiniń kásibı sheberlikterin kórsetip, «Qara jorǵa» jáne «Kóktemgi sezim» atty horeografııalyq qoıylymdar usyndy. Merekelik baǵdarlama barysynda kórermender olardyń ónerin zor yqylaspen qabyldady. Bı qoıylymdaryn daıyndaýǵa jáne sahnalaýǵa Horeografııa jáne art-menedjment kafedrasynyń oqytýshysy, magıstr Berik Alpyspaevıch Kýketov jetekshilik etti.
Bul is-shara stýdentter úshin kásibı quzyrettilikterin arttyrýǵa, shyǵarmashylyq qabiletterin shyńdaýǵa mol múmkindik berdi. Qazaq ulttyq qyzdar pedagogıkalyq ýnıversıteti aldaǵy ýaqytta da bilim alýshylardyń kásibı damýy men shyǵarmashylyq áleýetin arttyrýǵa baǵyttalǵan bastamalardy qoldap, túrli mádenı jáne óner jobalaryna belsendi qatysýdy jalǵastyrady.
