«Dıplommen aýylǵa» memlekettik jobasy 15 jyldan beri júzege asyrylyp keledi. Baǵdarlama negizinen aýyldaǵy kadr tapshylyǵy sheshýge baǵyttalǵan. Bul joba arqyly densaýlyq saqtaý, bilim berý, áleýmettik qorǵaý, mádenıet, sport, agroónerkásiptik keshen salasyna, sondaı-aq jergilikti jerlerdegi memlekettik basqarý organdaryna jas mamandardy tartý kózdelgen.
Jobaǵa qatysýshylarǵa 100 AEK mólsherinde birjolǵy kóterme járdemaqy beriledi. Turǵyn úı satyp alýǵa nemese salýǵa aýdan ortalyǵynda 2 500 AEK, aýyldyq eldi mekende 2 000 AEK bıýdjettik kredıt bólinedi. Kredıt 15 jylǵa beriledi. Mindetti shart - aýyldyq jerde keminde úsh jyl jumys isteýi qajet.
2023 jylǵy 1 sáýirden beri jobany iske asyrý jónindegi agent «Otbasy bank» AQ. Sıfrlandyrý maqsatynda ótinim berý men kredıt alýdyń barlyq prosesi Baspana Market — otbasybank.kz/programm-bank platformasynda tolyqtaı avtomattandyrylǵan.
Joba iske asyrylǵan 2009-2024 jyldary 114 myńnan astam maman 23,6 mlrd teńgege kóterme járdemaqy alǵan. 52 myńnan astam maman 189,5 mlrd teńge somasyna bıýdjettik kredıtti paıdalandy.
Birjolǵy kóterme járdemaqy alýshylardyń qurylymy:
- Bilim berý salasyndaǵy mamandar-78 myń adam (68,3%);
- Densaýlyq saqtaý qyzmetkerleri — 24,4 myń adam (21,4%);
- Mádenıet, sport jáne áleýmettik qorǵaý qyzmetkerleri-6,9 myń adam (6%);
- Aýyl sharýashylyǵy mamandary-4 myń adam (3,5%);
- Aýyldyq okrýg ákimi apparatyndaǵy memlekettik qyzmetshiler-900-ge jýyq adam (0,8%).
Turǵyn úı kredıtin alýshylardyń qurylymy:
- Bilim berý salasyndaǵy mamandar-35,1 myń adam (67,1%);
- Densaýlyq saqtaý mamandary — 11,6 myń adam (22,2%);
- Mádenıet, sport jáne áleýmettik qorǵaý qyzmetkerleri-3,4 myń adam (6,4%);
- Aýyl sharýashylyǵy mamandary-1,9 myń adam (3,6%);
- Aýyldyq okrýg ákimi apparatyndaǵy memlekettik qyzmetshiler-360-tan astam adam (0,7%).
