Almaty sırkiniń artısteri, áıgili «SERBAT» akrobatıkalyq tobynyń músheleri – Batyr Januzaq pen Marlen Maratov Mılandaǵy bedeli joǵary «Lo Show Dei Record» halyqaralyq shoýynda erekshe rekord ornatyp, Gınnestiń rekordtar kitabyna endi. Bul týraly Almaty qalasynyń óńirlik kommýnıkasııalar qyzmetiniń baspasóz konferensııasynda rekord jasaǵan ónerpazdardyń ózderi baıandady.
Kórermenderdi ǵana emes, halyqaralyq qazylar alqasyn da tańǵaldyrǵan qazaq sırkiniń maıtalmandary Italııada baspaldaqtan tóńkerilip túsken adammen birge eń qıyn trıýkti 36,66 sekýndta oryndaǵan. Osylaısha kúrdeli nómir almatylyq akrobattardyń erekshe daıarlyǵyn, eptiligi men sheberligin pash etti.
«Bul keremet sát boldy. Biz bul rekordqa uzaq ári tabandylyqpen daıyndaldyq. Búkil zaldyń qoshemetine bólený – umytylmaıtyn erekshe sát boldy!», deıdi, áıgili «SERBAT» akrobatıkalyq tobynyń múshesi Batyr Januzaq.
Almaty sırkiniń akrobatıka óneriniń sheberi Marlen Maratov da áriptesin qýattaı kele: «Biz úshin bul jaı ǵana rekord emes, bul búkil komandamyzdyń eńbegine, sırk ónerine degen mahabbatyna berilgen baǵa. Bizge senim artqan barsha jankúıerlerge alǵysymyz sheksiz!», dedi.
«SERBAT» sırk toby buǵan deıin de álemdik sahnalarda tanylyp, «America's Got Talent», «Britain's Got Talent», «China’s Got Talent» syndy ataqty shoýlarda óner kórsetip, jeńisti oryndardan tabylǵan.
Baspasóz máslıhatynda Qazaq memlekettik sırkiniń dırektory Maqsat Jaıyqov óz ónerpazdarymen maqtanyp: «Bul rekord – jeke jetistik qana emes, sonymen qatar qazaq sırk óneriniń damýyna qosylǵan zor úles. Qazaqstanda naǵyz sırk sheberleri bar ekenin búkil álem taǵy da moıyndady», dedi
Qazaq memlekettik sırkiniń dırektory bul rekord otandyq ártisterdiń deńgeıin dáleldep, Almaty sırkiniń halyqaralyq arenadaǵy bedelin nyǵaıtýǵa jasalǵan taǵy bir qadam bolǵanyn atady.
Almaty
