Foto: Ashyq derekkóz
Bıylǵy áskerı paradqa Shymkent qalasyndaǵy №35748 áskerı bóliminiń ókilderi belsendi qatysty. Atalǵan bólimniń úrlemeli aspaptar orkestri sherýde óner kórsetip, merekelik rýhty kótere tústi. Sonymen qatar, osy bólimnen 7 áıel áskerı qyzmetshi sap túzep, sherýge qatysty. Olar – áskerı qyzmettiń túrli baǵytynda tabysty eńbek etip júrgen názik jandy mamandar.
Qalanyń ózge de áskerı bólimderinen arnaıy tehnıkalar, sarbazdar men ofıserler qatystyrylyp, patrıottyq shara joǵary deńgeıde ótti. Paradtyń shymyldyǵyn Shymkent avıasııalyq áskerı bóliminiń 6 Sý-25 shtýrmovıgi japty. Bul topty I-synyp ushqyshy, II dárejeli «Aıbyn» ordeniniń ıegeri, polkovnık Ǵaırat Talapshoev basqardy. Ushqyshtar Qazaqstan Respýblıkasy Týynyń beınesin aspanda aıshyqtap, kórermenderge umytylmas áser syılady.
Saltanatty sharany kórý múmkindigi Shymkentten arnaıy Astanaǵa barǵan 15 eńbek ardagerine de buıyrǵan. Olar paradty arnaıy shaqyrtýmen aldyńǵy qatardan tamashalady.
«Meniń atam men ákem de Uly Otan soǵysyna qatysqan. Búgingideı beıbit zamanda mundaı tarıhı sharalardy kórý — men úshin úlken maqtanysh. Eldiń qorǵanys qabiletin, jastardyń sap túzegen sátin kórý — bolashaqqa degen senimdi arttyrady», deıdi qala turǵyny, zeınetker О́telbaı Amalbekov.
