Jalpy, kásiporyn eldegi biregeı qyzmet kórsetetin oryn ekenin tyńǵylyqty isimen jáne minsiz sapasymen dáleldep keledi. Kásiporyn júk jáne tońazytqysh vagondarǵa kúrdeli jóndeý jumystaryn júrgizýmen aınalysady. Materıaldyq-tehnıkalyq bazasy zaman talabyna tolyq jaýap beredi. Birneshe seh kompıýterlik tehnıka, dıagnostıkalyq qurylǵylarmen qamtamasyz etilgen. Jóndeý bazasynda vagondardyń aqaýyn anyqtaý, tetikterin jańartý úshin aldymen dıagnostıkadan ótkizip, anyqtap alady. Odan soń vagon qurastyrý sehynda tejegish, vagon qabyrǵalary men bilikter, qaqpaǵy jóndeledi.
Eńbek – aýyr, eńbekaqy – joǵary
– Mehanıkalyq sehta vagondardy jóndeýge qajetti qosalqy bólshekter daıyndalady, – deıdi seriktestiktiń bas ınjeneri Darhan Baltabaı, – bizdegi stanoktardyń deni Reseıden ákelingen. Árıne, ondaı qurylǵylar Qytaıda da bar. Bul arada aıta ketetin bir jaı – Qytaıdan jetkizilgen qurylǵylar isten shyqsa, mamandardy shaqyrý uzaq ýaqyt alady. Al óndiris qarap turmaýǵa tıisti. Tapsyrys alǵannan keıin ýaqytynda aıaqtaýǵa jaýaptymyz.
Bir jaqsysy, mamandar jetkilikti. Ortasha aılyq 400 myń teńge kóleminde.
– Sehta jumys birshama aýyr, esesine tabys kóp. Sehtyń ishi aınadaı jarqyrap tur. Qysta jyly, jazda salqyn. Eńbek qaýipsizdigine erekshe mán beriledi, – deıdi sehtyń aǵa sheberi Iýrıı Agafonov, – toqsan jyldyq tarıhy bar kásiporynda ózindik eńbek dástúri qalyptasqan. Aǵa býyn jumysqa yntaly jastardy baýlyp, bar bilgenin úıretip, qatarǵa qosýǵa tyrysady. Jas talapkerler aldyndaǵy úlgi bolar ozattar qataryna qosylýǵa talpynady.
Áke jolyn jalǵaǵan ulan
Besinshi razrıadty slesar Baqytjan О́mirtaev ozattar qatarynda. Ákesi de osy depoda jumys istepti.
– Joǵary oqý ornynyń zań fakýltetin bitirgenimmen, áke jolyn jalǵastyrǵym keldi. Kásiporyn basshylary áleýmettik-turmystyq jaǵdaıymyzǵa qarasyp turady. Eńbekaqy jetkilikti. Kásiporynnyń ashanasy, medısınalyq pýnkti, sport zaly kóńilden shyǵady. Jumys kıimderin jýatyn oryn da bar.
Usta-sharýashylyq sehynda negizinen vagonnyń edenine qajetti jabdyqtar daıyndalady eken. Jabyq vagondardy qaptaıtyn taqtaıshalar da súrgilenip jatyr. Seh kásiporynnyń ózge de qajettiligine oraı aǵash buıymdardy oımaqtaı etip óńdep shyǵarady.
Mekeme merzimge mán beredi...
Kásiporynnyń bas ınjeneri Darhan Igilikulynyń aıtýynsha, depoda jóndelgen vagondar birden jol boıyna shyǵyp ketpeıdi, muqııat synaqtan ótkiziledi. Talap óte kúshti. 2005 jyly depo halyqaralyq jáne memlekettik standarttarǵa saı keletin jumys júıesi úshin halyqaralyq sertıfıkatqa ıe bolypty. Búginde seriktestikte 323 adam jumys isteıdi. Ujymda jastar kóp. Seriktestiktiń bas dırektory Jeńis Muhammedǵalıev kásiporyndaǵy jumysshylardyń kásibı sheberligin arttyrýǵa erekshe mán beredi. Jyl saıyn ozat jumysshylardy yntalandyrý dástúrge aınalǵan. «Qurmetti temirjolshy» belgisimen marapattalǵandar da az emes.
Sapaǵa qol jetkizgendikten de básekelestik synyna tótep berip, bereke úıirilip tur-aý.
Aqmola oblysy
