Mınıstrdiń aıtýynsha, maýsym aıynda Qazaqstannyń basym bóliginde ortasha aılyq aýa temperatýrasy klımattyq normanyń sheginde bolady — soltústikte jáne ortalyqta 17-20 gradýs shamasynda, al batys óńirlerde 23-25 gradýsqa deıin.
Ońtústik-batysta jáne elimizdiń qıyr ońtústiginde ádettegiden ystyq bolady – jazyq aımaqtarda ortasha temperatýra 24-28 gradýs, al eń joǵary temperatýra 45 gradýsqa deıin jetýi múmkin.
Jaýyn-shashyn mólsheri batys jáne soltústik-shyǵys óńirlerde normaǵa saı bolady, al basqa aımaqtarda negizinen normadan tómen bolady dep kútiledi.
Shilde aıynda uzaq merzimdi boljamǵa sáıkes, aýa temperatýrasy klımattyq norma sheginde bolady, al shyǵys jáne ońtústik-shyǵys óńirlerde ortasha eseppen normadan 1 gradýs joǵary bolady.
Jaýyn-shashyn kólemi negizinen kópjyldyq normalar sheginde boljanýda, tek elimizdiń qıyr soltústik-batysynda, soltústiginde, ońtústigi men ońtústik-shyǵysynda normadan joǵary bolýy múmkin.
Aldyn ala boljam boıynsha, tamyz jáne qyrkúıek aılary ónim qalyptastyrý men egin jınaý jumystary úshin qolaıly bolmaq. Aýa raıy turaqty bolady, kóp mólsherde jáne uzaqqa sozylatyn jaýyn-shashyn kútilmeıdi. Eldiń basym bóliginde ortasha aılyq aýa temperatýrasy klımattyq normadan 1 gradýs joǵary bolady.
Mınıstr jazǵy aılarǵa arnalǵan bul aldyn ala boljam aı saıynǵy naqty boljamdarmen tolyqtyrylyp, naqtylap otyratynyn atap ótti.
