Foto: inbusiness.kz
Alty jyl ishinde 2,014 mln sharshy metr aýmaqty qamtıtyn geologııalyq barlaý jumystary júrgizilgen. Bul josparlanǵan aýmaqtyń 91,6% qurap otyr.
Baǵdarlama 2026 jylǵa qaraı el aýmaǵyn geologııalyq turǵydan tolyq qamtý, jer qoınaýynyń ınvestısııalyq tartymdylyǵyn arttyrý jáne mıneraldyq-shıkizat keshenin turaqty damytýdyń ǵylymı bazasyn qalyptastyrýdy kózdeıdi.
112 ýchaskede tórt negizgi baǵyt: geologııalyq barlaý, mıneralogııalyq karta jasaý, tereń kartalaý jáne gıdrogeologııa boıynsha jumystar aıaqtalǵan. Boljamdy resýrstary bar 38 perspektıvaly baǵyt anyqtalǵan. Olar:
- sırek jer metaldary – 2,6 mln tonna
- mys pen nıkel – 3,7 mln tonna
- qońyr kómir – 1,1 mlrd tonna
- altyn – 19 tonna.
Odan bólek munaı-gaz ónerkásibi Aral shógindi basseıninde 266 mln tonna kóleminde alynatyn kómirsýtek resýrstaryn tapty.
Mınıstrlik málimetinshe, baǵdarlamany júzege asyrý kezeńinde geologııalyq barlaýǵa 306 lısenzııa berilgen. Salaǵa tartylǵan jeke ınvestısııa kólemi 137 mlrd teńgeden asqan.
Osy kezeńde kadrlar sany men geolog mamandyǵynyń tanymaldylyǵy da arta túsken. Máselen, 2022-2024 jyldar aralyǵynda geologııa mamandyǵyn bitirýshiler sany 2,5 esege ósken. Sondaı-aq, sala mamandaryna arnalǵan tuńǵysh memlekettik marapat – «Eńbek sińirgen geolog» taǵaıyndalǵanyn atap ótken jón.
«Qazaqstan geologııalyq barlaý jumystarynyń sapasy men jer qoınaýyn paıdalanýdyń ashyqtyǵy boıynsha Ortalyq Azııada kóshbasshy bolýǵa bet aldy. Qalǵan 200 myń sharshy metrdi qamtıtyn baǵdarlama 2025-2026 jyldary jalǵasady. Nazar ońtústik jáne batys aımaqtarǵa, onyń ishinde Syrdarııa basseınine jáne sırek metaldar boıynsha perspektıvaly aımaqtarǵa aýdarylady», delingen mınıstrlik habarlamasynda.
