Bul kúni «Shyǵys mamany» atty bos jumys oryndar jármeńkesine 2 myńnan astam adam qatysyp, ózderine laıyq dep tapqan jumys berýshilermen tildesti. Ulttyq statıstıka bıýrosynyń málimetine súıensek, byltyr elimizde jumyssyzdar sany 448,2 adam bolǵan. Bul 2023 jylmen salystyrǵanda 0,5%-ǵa kóp. Al, búgingi jármeńke túlekter úshin taptyrmas múmkindik. Maman tappaı júrgen mekemelerge de óte tıimdi.
– Bul joly jármeńkege aýdandar men qalalardan 113 jumys berýshi 2 myńnan astam bos jumys ornyn usyndy. Jergilikti oqý oryndarynan 2300-ge jýyq stýdent kelip qatysyp jatyr. Túlekter dıplom alǵannan keıin birden jumysqa ornalasyp, alys aýdandarǵa baryp jumys izdemeý úshin barlyǵyn bir alańda jınadyq. Qazir oblysta muǵalim, dáriger, medbıke, qurylysshy mamandyqtaryna suranys artqanyn baıqap otyrmyz. Bul jastardyń mamandyqpen jumysqa ornalasýyna jaqsy múmkindik dep oılaımyn, – dedi Mansap ortalyǵynyń dırektory Araılym Esimbekova.
Shekara shebindegi Marqakól aýdany ákimdiginiń ókilderi de búgingi sharaǵa arnaıy kelgen. Olar memlekettik qyzmetke qyzyǵýshylyq bildirgen jas mamandardy jańa aýdanǵa jumysqa shaqyryp júr.
– Qazir bizde derbes bólimderde, ákim apparatynda, áleýmettik jumyspen aınalysatyn 28 bos jumys orny bar. Qyzyǵýshylyq bildirgender aıtarlyqtaı kóp dep aıta almaımyz, biraq kelip jatyr. Aýylda jumys isteýge nıetti jastarǵa qazir múmkindik kóp. «Dıplommen aýylǵa» baǵdarlamasy arqyly baspana satyp alýǵa nemese salýǵa nesıe jáne kóterme járdemaqy beriledi, – dedi Marqakól aýdany ákimi apparaty jalpy bóliminiń basshysy Ásem Bolysova.
Sondaı-aq, Katonqaraǵaı aýdanynda salynyp jatqan áýejaıǵa da mamandardyń qajet ekendigi aıtyldy. Ásirese, áýe qozǵalys qyzmetine dıspetcher, meteorologııalyq qyzmetke sınoptıkter jáne radıotehnıkalyq jabdyqtarǵa qyzmet kórsetý ınjenerleri qajet.
Odan bólek polısııa qyzmetine, tótenshe jaǵdaılar departamentine de mamandar izdestirilip jatty.
Shyǵys Qazaqstan oblysy
