Salystyrmaly túrde aıtsaq, byltyr 55 myń gektardy lazermen tegisteýdiń nátıjesinde 200 mln tekshe metr sý únemdelgen. Al ortasha ónimdilik gektaryna 40-55 sentnerden 70-80 sentnerge deıin ulǵaıdy. Aıta ketsek, Úkimet aýyl sharýashylyǵy kooperatıvteriniń lazermen tegistegishterdi satyp alý shyǵyndaryn 50%-ǵa deıin sýbsıdııalaıdy.
«Sizdermen eń alǵash kezdeskenimde birneshe usynys aıtqan edińizder. О́tinishterińiz boıynsha biz kooperatıvterge arnalǵan sýbsıdııa mólsherin 25%-dan 50%-ǵa deıin ulǵaıttyq. Osyǵan deıin sýbsıdııa egistik alqaby 200 gektardan asatyn sharýashylyqtarǵa ǵana tólenedi degen talap bar edi. Biz Aýyl sharýashylyǵy mınıstrligimen birlese otyryp, bul shekteýdi de alyp tastadyq», dedi Sý resýrstary jáne ırrıgasııa mınıstri Nurjan Nurjigitov.Búgingi tańda Qyzylorda oblysynda lazermen tegisteıtin 123 tehnıka bar. Bul 100 myń gektarǵa deıin egistik alqapty qamtýǵa múmkindik beredi. Bıyl aýa raıynyń erekshelikterine baılanysty Qyzylorda oblysynda da sýarý maýsymy ádettegiden erterek bastaldy. Jaýyn-shashyn bolmaǵandyqtan sýarmaly sýǵa suranys eki ese artyp otyr. Búginde óńir dıqandaryn sýmen qamtý úshin Shardara sý qoımasynan sekýndyna 600 tekshe metr sý jiberilip jatyr.
«Mınıstrligimiz Prezıdenttiń tapsyrmasy boıynsha sýdyń «kóleńkeli naryǵyn» joıý úshin mańyzdy sheshimder qabyldady. Endi «Qazsýshar» fılıaldary kelisimshartqa otyrǵan sharýa qojalyqtaryna ǵana sý beredi. Zańsyz sý alýǵa ruqsat joq. Jańa Sý kodeksinde de osy máselege basa nazar aýdarylyp, jaýapkershilik kúsheıtildi. Qujat 10 maýsymnan bastap kúshine enedi», dedi vedomstvo basshysy.
