Sýret: qazaly.kz
Qoldanystaǵy zańnamaǵa sáıkes jumystan bosatylǵan jumyskerler mindetti áleýmettik saqtandyrý júıesine qatysý ótiline, keıingi 24 aıdaǵy tabysyna baılanysty esepteledi. Ár azamat jumysynan aıyrylǵan jaǵdaıda 1 aıdan 6 aıǵa deıin áleýmettik tólem alady. Tólenetin qarajat azamattyń jumys istep júrgendegi tapqan tabysynyń 45%-yna deıingi mólsherde MÁSQ qarajaty esebinen beriledi.
Jumystan bosatylǵan jumysker áleýmettik tólem alý úshin aldymen eGov.kz portalynda avtorızasııadan ótedi. «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaıdy. Elektrondy sıfrlyq qoltańbasyn qoıyp, ótinim joldaıdy. 1 kún ishinde turǵylyqty jerindegi mansap ortalyǵy bos jumys oryndaryn usynady. Eger jumys tabylmasa, 3 jumys kúni ishinde jumyssyz degen mártebe beriledi. Bul qyzmetti onlaın rejimde Elektrondyq eńbek bırjasy (enbek.kz) arqyly da alýǵa bolady.
Jumyssyz retinde tirkelgennen keıin Eńbek jáne halyqty áleýmettik qorǵaý mınıstrliginiń aqparattyq júıesi proaktıvti formatta málimet jiberedi. Memlekettik áleýmettik saqtandyrý qorynan tólem taǵaıyndaý boıynsha qyzmet kórsetýge kelisý úshin mobıldi telefonǵa SMS-habarlama joldaıdy. Jumysynan aıyrylǵan adam kelisse, habarlamaǵa jaýap qaıtarady. Tólem avtomatty túrde taǵaıyndalady. Áleýmettik tólem jumystan shyǵý sebepterine qaramastan júzege asyrylady, ári jumyssyz qalǵan adamdy jumys tapqansha qoldaý maqsatynda beriledi.
