Ásilinde el birinshiligi jyldy qaıyryp, jeltoqsan aıynyń sońyna qaraı ótetin. Mundaı sheshimniń qabyldanýy kúntizbe josparyndaǵy saıystardyń óte kóp ekenin ańǵartsa kerek. Bıylǵy bes aıdyń ishinde jasóspirimder, jastar arasynda el chempıonaty ótti. Álemdik doda, odan bólek Azııa aımaǵynyń birinshiligi de túńligin túrdi. Qurlyqtyń jeke chempıonaty da máresine jetti. Mine, osyndaı dárejeli dodalarǵa qatysyp, baı tájirıbe jınaǵan shahmatshylar elorda tórinde tartysqa túsedi. Iаǵnı fınaldyq saıysqa jetken 28 shahmatshy júldesi qomaqty birinshiliktiń báıgesi úshin baryn salady. Olardyń arasynda byltyrǵy el birinshiliginde jeńimpaz atanǵan 5 úzdik shahmatshy bar. Bıylǵy irikteýdiń jartylaı fınaldyq synynda joǵary nátıje kórsetken 3 sańlaq bar. 18 ben 20 jasqa deıingi jastar arasynda chempıon atanǵan 2 shahmatshy, sonymen qatar shahmat federasııasy jattyqtyrýshylar keńesi usynǵan 4 úzdik te dodada baǵyn synaıdy.
Fınaldyq saıys eki sanatta ótip jatyr: Open (ashyq) jáne Women (áıelder). Árqaısysyna 14 shahmatshydan qatysady. Týrnırdiń formaty 13 týrdan aınalmaly júıemen ótedi. Ár partııaǵa 90 mınýt berilse, ár júris úshin birinshisinen bastap 30 sekýnd qosylady. Júldege tigilgen 20 mıllıon teńge ár sanat boıynsha júldeli oryn alǵan shahmatshylarǵa beriledi. 1-oryn ıegerine 3 mıllıon, 2-orynǵa 2 mıllıon, 3-orynǵa 1,5 mıllıon, 4-orynǵa 1,2 mıllıon, 5-orynǵa 900 myń, 6-orynǵa 700 myń, 7-orynǵa 500 myń teńge syıaqy berilmek.
Áıelder arasynda keıingi 10 jylda reıtıngtik upaıyn eselep, Azııa chempıonatynda júlde alǵan talantty shahmatshylar bar. Atap aıtqanda, eki dúrkin el chempıony Merýert Qamalıdenova, 2023 jyly ishki birinshilikte top jarǵan Ksenııa Balabaeva, byltyrǵy chempıonatta ozyq shyqqan Ámına Qaıyrbekova, blısten Azııa chempıony Alýa Nurman. Burymdylar tartysynda baq synaýshylardyń eń jas qatysýshylary Elnaz Qalıahmet pen Marııa Holıavka, 14 jasta. Jalpy, bıylǵy el chempıonatynyń júldesinen úmitkerlerdiń kópshiligi 20 jasqa tolmaǵan talantty shahmatshylar.
Ashyq sanatta (Open) álem chempıonatynyń júldegerleri, halyqaralyq týrnırlerdiń jeńimpazdary, aımaqtyq týrnırlerdiń fınalısteri baq synaıdy. Olardyń arasynda byltyr 20 jasqa deıingiler arasynda álem chempıony atanǵan Qazybek Nógerbek, jasóspirimderdiń álemdik dodasynda medal oljalaǵan Erǵalı Súleımen, Azııa aımaǵynyń jeńimpazy Aldııar Ańsat, eki dúrkin el chempıony Denıs Mahnıov, Ramazan Jalmahanov syndy talantty jastar bar. Eresekter tartysyna qatysýshylardyń eń jasy
Aldııar Jaýynbaı nebári 13 jasta.
Shahmat federasııasynyń vıse-prezıdenti Marat Esenov fınaldyq saıysta básekelestik joǵary bolatynyn atap ótti.
«Astanada ótip jatqan el birinshiliginiń fınaldyq dodasy tartysqa toly bolmaq. Buǵan deıin halyqaralyq týrnırlerde, álem chempıonattarynda bir komandada el abyroıyn qorǵaǵan úzdikter búginde bir-birine qarsylas bolyp oınaıdy. Ulttyq qurama komandanyń bapkerleri osy saıysta sheberligimen tánti etken talanttardy jahandyq dodalarǵa qosýǵa qam jasaıdy. Demek, jasóspirimder men jastarymyzǵa ózderiniń áleýetin kórsetýge orasan múmkindik týyp otyr. Myna shahmatshy shappaı báıge alady dep aldyn ala baılam jasaı almaısyń, sebebi irikteý kezeńinde tek kil myqtylar ǵana sýyrylyp shyqty. Qýanarlyǵy, elimizde shahmattan jastardyń qalyń shoǵyry ósip keledi. Keıingi jyldardaǵy álemdik saıystardan orasan oljamen oralyp júrgen sańlaqtardyń tabysy sonyń aıǵaǵy. Memlekettiń de, federasııanyń da qamqorlyǵy nátıjesinde mektepterde shahmat úıirmeleri ashylyp, balalardyń qyzyǵýshylyǵy arta tústi. Bıylǵy el chempıonatynyń jeńimpazy men júldegerlerine qomaqty syıaqy berilýi de federasııanyń zııatkerlik oıynǵa aıryqsha kóńil bóletinin ańǵartady. Odan bólek, 45 úzdik shahmatshynyń sheberligin shyńdaý talabyn yntalandyrý maqsatynda qarjylaı qoldaý kórsetilmek. Bapkerlerdi, tóreshilerdi oqytyp, tájirıbesin arttyrýyna da jaǵdaı jasalyp keledi», dedi M.Esenov.
El chempıonatynyń jeńimpazdary men júldegerleri 1 maýsymda anyqtalady.
