134 jyldyq tarıhy bar Rolan Garrosta talaı jaqsylar men jaısańdar jasyndaı jarqyldaǵanyn jankúıerler jaqsy biledi. Erler arasynda eń kóp tabysqa jetken Rafael Nadal. Ispanııanyń maqtanyshy 2005–2022 jyldar aralyǵynda 14 týrnırde top jardy. Dál osy sańlaq atoı salǵan kezeńde tek úsh tennısshiniń ǵana ony tuǵyrdan taıdyrýǵa shamasy jetti. Olar – shveısarııalyq Rodjer Federer men Sten Vavrınka, serbııalyq Novak Djokovıch. Federer 2009 jyly, Vavrınka 2015 jyly, Djokovıch 2016 men 2021 jyldary bas júldeni oljalady. Qalǵan jarystardyń barlyǵy Rafael Nadaldiń jarqyn jeńisimen aıaqtaldy.
HH ǵasyrdyń basynda kortta erkin oıqastaǵan fransııalyq Maks Dekıýjıdiń segiz márte mereıi ústem boldy. Jetpisinshi jyldary Born Borgtiń basymdyǵy aıqyn baıqaldy. Shvesııanyń marqasqasy alty týrnırde top jardy. О́tken ǵasyrdyń alǵashqy jartysynda óner kórsetken Fransııanyń oıynshysy Anrı Koshe baıraqty básekeniń beseýinde qarsylas shaq keltirmedi.
Áıelder arasyndaǵy rekordtyq kórsetkish Krıs Evertke tıesili. Amerıkalyq arý 1974–1975, 1979–1980, 1983, 1985–1986 jyldary jeti jarystyń jeńimpazy atandy. Fransııalyq Sıýzan Lenglen (1920–1923, 1925–1926) men germanııalyq Shteffı Graf (1987–1988, 1993, 1995–1996, 1999) alty márte aldyna jan salmady. Aýstralııalyq Margaret Korttyń (1962, 1964, 1969–1970, 1973) bes týrnırde juldyzy jandy.
Fransııanyń bas shaharynda jyl saıyn ótip turatyn dástúrli týrnırde talaı tańdaı qaǵarlyq jaıttar da oryn aldy. Máselen, 2004 jyly jergilikti qos tennısshi – Fabrıs Santoro men Arno Kleman arasyndaǵy match 6 saǵat 33 mınýtqa sozyldy. 2010 jylǵy fınalda japonııalyq Karýmı Naraı rýmynııalyq Monıka Nıkoleskýden basym tústi. Bul kezdesý 4 saǵat 42 mınýttan keıin óz máresine jetti. 1988 jyly Germanııanyń myqtysy Shteffı Graffqa KSRO-nyń ókili Natalıa Zverevany eńserýge nebári 34 mınýt jetkilikti boldy. Bul báseke 6:0, 6:0 esebimen aıaqtaldy.
Byltyrǵy Rolan Garrosta ıspanııalyq Karlos Alkarasqa teń keler eshkim tabylmady. Bastapqy básekelerde Flavıo Kobollı (Italııa), Taro Danıel (Japonııa), Denıs Shapovalov (Kanada), Lorenso Mýzettıden (Italııa) mereıi ústem bolǵan ıspanııalyq tennısshi shırek fınalda Stefanos Sısıpasty (Grekııa), jartylaı fınalda dańqy jer jarǵan Novak Djokovıchti jeńdi. Fınalda Kasper Rýdty (Norvegııa) qapy qaldyrdy.
Áıelder saıysynda Iga Svıontek shashasyna shań juqtyrmady. Sonyń aldyndaǵy eki týrnırde de Polshanyń ókili eshkimge des bermegen edi. Bul joly alǵashqy aınalymdarda Leolııa Janjan (Fransııa), Naomı Osaka (Japonııa), Marııa Boýzkova (Chehııa), Anastasııa Potapovadan (Reseı) aılasyn asyrdy. Shırek fınalda Marketa Vondroýshovany (Chehııa) utty. Jartylaı fınalda Koko Gaýffty (AQSh) jolynan yǵystyrsa, fınalda Jasmın Paolınıdiń (Italııa) osal tusyn ońaı tapty.
Byltyrǵy Rolan Garrosta elimizdiń tennısshileri arasynan eń úzdik nátıjege Elena Rybakına qol jetkizdi. Álemniń 12-raketkasy shırek fınalǵa deıin jetip, sol mejede Jasmın Paolınıge jol berdi. Onyń aldynda jerlesimiz Gret Mınnen (Belgııa), Arancha Rýs (Nıderland), Elıze Mertens (Belgııa), Elına Svıtolına (Ýkraına) syndy tanymal tennısshilerdi tize búktirgen edi. О́kinishke qaraı, ózge oıynshylarymyz sátsiz óner kórsetti. Iýlııa Pýtınseva ekinshi kezeńde Paýla Badosadan (Ispanııa), Aleksandr Shevchenko Loreso Mýzettıden (Italııa) jeńildi. Aleksandr Býblık pen Tımofeı Skatov alǵashqy aınalymnan asa almady.
Parıjdegi týrnırdiń tarıhynda elimizdiń eki tennısshisi ǵana shırek fınalǵa deıin jetken. Olar – Iаroslava Shvedova men Elena Rybakına. Sporttyq mansabyn áldeqashan aıaqtaǵan Shvedova 2010, 2012 jyldary, búginde óreli ónerimen tórtkúl dúnıe jankúıerlerin tamsandyryp júrgen Rybakına 2021, 2024 jyldary sol mejeden kórindi. Sál erterekte elimizde týyp-ósip, keıinnen Reseı azamattyǵyn alǵan Elena Lıhovsevanyń jartylaı fınalda oınaǵany da esimizde. Negizinen jekelegen saıysqa qaraǵanda juptyq básekedegi tabysymyz qomaqty. Máselen, 2015 jyly aýstralııalyq Keısı Dellakkvamen jup qurǵan Iаroslava Shvedova, 2021 jyly Aleksandr Býblık pen Andreı Golýbev juby fınalda oınady.
