- Bolgarııanyń Panagıýrısh qalasynda ústel tennısinen WTT «Youth Contender» týrnıri aıaqtaldy. 13 jasqa deıingi qyzdar arasyndaǵy saıysta Jánııa Bekmuhambetova bas júldeni oljalady. Jarys barysynda jas sportshy bolgarııalyq Radına Zaharıeva, Martına Nıkolova, Beloslava Balkanskaıa, slovakııalyq Vıven Mýrkova, rýmynııalyq Karıss Serban men Bıanka Tomýdy utty. Endi Jánııadan bólek, Artıom Vaplet, Dagır Danııarov, Ámir Sarqytbaı syndy jas órender Ispanııanyń Pladja-de-Arosynda jalaýy jelbireıtin jarysta baq synaıdy.
- AQSh-tyń Los-Andjeles qalasyndaǵy «Industry Hills Expo Center»-de «International Taekwondo Fest 2025» dep atalatyn halyqaralyq týrnır aıaqtaldy. Tórtkúl dúnıeniń ár qıyrynan jınalǵan 300-den asa taekvondoshy qatysqan jarysta Ádilet Bazarbaevtyń baǵy jandy. 63 kg salmaq dárejesinde kúsh synasqan ol Taha Hozema Hambatı, Stenlı Lopes, Alden Rıý syndy sheberlerdi aıqyn basymdyqpen utyp, bas júldeni qanjyǵasyna baılady.
- Aqtóbede taekvondodan (WT) el kýboginiń birinshi kezeńi óz máresine jetti. Komandalyq esepte Almaty qalasy ozyp, 3 altyn, 2 kúmis, 4 qolany oljalady. Ekinshi, úshinshi oryndardy Atyraý (2 altyn) men Túrkistan oblysy (1 altyn, 2 kúmis, 2 qola) ıelendi.
- Týrındegi týrnırde top jarǵannan keıin elimizdiń tennısshisi Aleksandr Býblık ATR reıtınginde birden 25 satyǵa joǵarylap, 51-orynǵa taban tiredi. Aleksandr Shevchenko 97-orynda. Erler arasynda áli de ıtalııalyq Iаnnık Sınner kósh bastap tur. Ekinshi, úshinshi oryndarda – ıspanııalyq Karlos Alkaras pen germanııalyq Aleksandr Zverev. WTA reıtınginde belarýstik Arına Sobolenko aldyna jan salar emes. Ony AQSh-tyń qos ókili Korı Gaýff pen Djessıka Pegýla ókshelep keledi. Elimizdiń eń úzdik oıynshysy Elena Rybakına 12-orynda, ekinshi raketka Iýlııa Pýtınseva 32-satyǵa jaıǵasty. Sondaı-aq Japonııadaǵy jeńisinen keıin Zarına Dıastyń da jaǵdaıy birshama jaqsardy. Jerlesimiz 43 satyǵa joǵarylap, bul kúnderi 275-orynda tur.
- Fransııanyń Strasbýrgindegi týrnırdi ekinshi kezeńnen bastaǵan elimizdiń birinshi raketkasy Elena Rybakına qytaılyq Van Sınıýıdi 6:1, 6:3 esebimen oısyrata utty. Úshinshi aınalymda polshalyq Magda Lınetpen sheberlik baıqasady. Jarystyń júlde qory 925 661 eýrony quraıdy.
