Sýretti túsirgen – Erlan OMAR, «EQ»
Elimiz boıynsha barlyq aýyl, aýdan jáne qala bul merekelik bastamaǵa belsene qatysady. Is-sharalar balalardy eldiń mádenı, bilim berý jáne qoǵamdyq ómirine keńinen tartýǵa baǵyttalǵan. Mereke kúnderi oblys, qala jáne aýdan ákimderiniń balalarmen kezdesýleri ótedi. Bul júzdesýde balalar óz usynystaryn aıtyp, arman-maqsattarymen bólise alady. Sonymen qatar osy kúnderi jańa bilim berý nysandarynyń ashylýy josparlanǵan. Teatr, mýzeı, saıabaqtar men kınoteatrlarǵa tegin nemese jeńildikpen barý múmkindigi qarastyrylǵan. Oǵan qosa balalarǵa qoldaý kórsetýge baǵyttalǵan óńirlik qaıyrymdylyq aksııalary uıymdastyrylady.
«Qazaqstan balalary» ulttyq onkúndigi balalardyń ósip-ónýine kóńil bólýge baǵyttalǵan. Is-sharalardyń maqsaty baldyrǵandarǵa qýanysh syılaý ǵana emes, sonymen qatar olardyń balalyq shaǵyna qamqorlyq kórsetý – memlekettik saıasattyń basty basymdyǵy ekenin kórsetý.
Osy maqsatta Astanadaǵy «Januıa» otbasyn qoldaý ortalyǵynda «Ákem – tiregim, anam – júregim» atty qaıyrymdylyq is-sharasy ótti. Jıyn aıasynda psıholog pen zańger keńesteri, konserttik jáne teatr qoıylymdary, sheberlik saǵattary men qyzyqty oıyndar uıymdastyryldy. Sondaı-aq áleýmettik osal otbasylardan shyqqan balalarǵa syılyqtar tabystaldy.
Nura aýdany boıynsha otbasyn qoldaý ortalyǵy áleýmettik súıemeldeý bóliminiń basshysy Aqyrys Ádilhanqyzynyń aıtýynsha, ortalyq ashylǵaly beri bul qyzmet 965 otbasyna kómek kórsetken.
«Januıa» otbasyn qoldaý ortalyǵynda áleýmettik súıemeldeý, keńes berý, zańgerlik jáne psıhologııalyq kómek kórsetý qyzmetteri qarastyrylǵan. Barlyǵy tegin. Sonymen qatar múgedektigi bar jandarǵa áleýmettik qyzmetter portaly arqyly tehnıkalyq kómekshi quraldarǵa ótinish berý, keńes alý boıynsha da qoldaý kórsetemiz. Búgingi jıynǵa da áleýmettik súıemeldeýde turǵan otbasylar men olardyń balalary qatysyp jatyr. Is-sharanyń negizgi maqsaty – ata-ana men bala arasyndaǵy baılanysty nyǵaıtý, balalar úshin qolaıly orta qalyptastyrý jáne ata-anamen ashyq dıalog qurý mádenıetin damytý. Jalpy, mundaı on kúndik baǵdarlama bıyl alǵash ret qolǵa alynyp otyr», dedi A.Ádilhanqyzy.
Iá, bul jıyndar – jaı ǵana is-shara emes. Bul – bala baqytynyń basty qundylyq ekenin kórsetetin qoǵamdyq úndeý. Balalarǵa qamqorlyq – árbir azamattyń ortaq mindeti, adamgershilik boryshy. Ár bala baqytty bolýǵa laıyq.
