Fınalda Qazaqstan atynan 20 jastaǵy Sanat Asýat óner kórsetti. Ol «Evrovıdenıe-2011» baıqaýynyń jeńimpazy Eldar Ǵasymovtyń komandasynyń quramynda boldy. Kórermenderdiń daýys berý nátıjesinde Sanat 20 paıyz daýys jınap, joba boıynsha úshinshi orynǵa ıe boldy.
Qazaq ánshisiniń fınaldaǵy qoıylymy keshtiń eń áserli sátteriniń biri boldy. Sanat fınalda « Səndən Nigaranam» ánin oryndady.
Sanattyń sońǵy óner kórsetken sátinen keıin onyń tálimgeri Eldar Ǵasymov shákirtiniń ónerine joǵary baǵa berip, jyly lebizin bildirdi.
«Men Sanatqa úlken senim artamyn. Ol úsh túrli qoıylym kórsetti jáne meniń oıymsha, sońǵysy eń áserlisi boldy. Men ony maqtan tutamyn. Sebebi óz ana tilinde emes, ázerbaıjan tilinde, ózge elde án aıtý – bul óte batyl ári jaýapty qadam», dedi Eldar Ǵasymov.
Ol Sanattyń jaı ǵana án salmaı, óziniń mádenıetiniń bir bólshegin kórermenge jetkize alǵanyn erekshe atap ótti.
«Sanat shyǵys ónerin úlken talǵammen jáne qurmetpen usyndy. Bul júrekten shyqqan jáne shynaıy óner boldy. Ázerbaıjan halqy onyń shynaıylyǵyn sezinip, ony óner ıesi retinde, óziniń jan dúnıesin sahnada ashyp kórsetken qazaqstandyq qyz retinde jaqsy kórdi dep senemin», dep tolyqtyrdy ol.
Sondaı-aq ol Sanattyń týǵan elinde de úlken qoldaýǵa ıe bolǵanyn aıtty.
«Búgin oǵan tek Ázerbaıjan ǵana emes, búkil Qazaqstan daýys berip otyr. Zalda Qazaqstannyń Ázerbaıjandaǵy Tótenshe jáne О́kiletti Elshisi, dıplomattar men qoldaýshylar da qatysyp otyr. Olarǵa erekshe alǵys aıtqym keledi», dedi ol.
Aıta keteıik, telejobanyń jeńimpazy – Ázerbaıjannyń halyq ártisi Roıa Aıhannyń shákirti Jámıla Gashımova atandy. Ol 45 paıyz daýys jınap, bas júlde – 25 myń manat (shamamen 7,5 mln teńge) ıelendi.
Fınaldaǵy nátıjeler kelesideı:
1 oryn – Jámıla Gashımova (Roıa Aıhannyń komandasy) – 45%
2 oryn – Ilgar Bekırov (Zúlfııa Hanbabaevanyń komandasy) – 22%
3 oryn – Sanat Asýat (Eldar Ǵasymovtyń komandasy) – 20%
4 oryn – Fýad Mehdıev (Mýrad Arıftiń komandasy) – 13%
Aıta keteıik, Sanat – jobanyń fınalyna shyqqan jalǵyz sheteldik qatysýshy. Shoý barysynda ol álemdik hıtterdi de, qazaq tilindegi ánderdi de oryndady. Shırek fınalda «Izin kórem» ánin oryndap, kórermenderdiń júregin jaýlap aldy.
Sanat Asýat – 20 jastaǵy Atyraý qalasynyń týmasy. Bala kezinen mýzykaǵa jaqyn bolyp, jetigen aspabynda oınaýdy úırengen. Qazir Almatydaǵy Júrgenov atyndaǵy Qazaq ulttyq óner akademııasynyń estradalyq vokal bóliminiń 3-kýrs stýdenti.
