Oblystyq tarıhı-ólketaný mýzeıiniń mamandary el ishinde bir áýlettiń ǵana múlki bolyp otyrǵan osyndaı muralar kóp ekenin aıtady. Osydan da mýzeı bastamasymen 2017 jyldan beri «Jas ólketanýshy» jobasy qolǵa alyndy. Mýzeı janynan ólketanýshylar úıirmesi jumys isteı bastady. Mýzeıler kúni aıasynda ǵylymı jobaǵa qatysqan mektep oqýshylarynyń jumysy sarapqa salynyp, tabylǵan jádiger komıssııa irikteýinen ótedi.
«Aýyl-aımaqtaǵy qundy jádigerlerdi jınaqtaıtyn jobaǵa qatysýshylar qatary jyl sanap artyp keledi. Byltyr jınalǵan 500-ge jýyq jádigerdiń 300-in, bıyl 200-den astamyn iriktep aldyq. Osy jylǵy tabysymyz Jalaǵash aýdany T.Júrgenov aýylyndaǵy Á.Ońalbaev atyndaǵy №117 orta mekteptiń 7-synyp oqýshysy Erkenaz Qýanyshbek atty oqýshynyń ǵylymı jumysyna ózek bolǵan osy saptama etik bolyp otyr. Jan-jaqty zertteý júrgizgen aýyl mektebiniń oqýshysy Seráli balýan týraly kóp derek jınapty. El aýzyndaǵy áńgimelerge qaraǵanda Seráli Dúısenuly kórnekti memleket jáne qoǵam qaıratkeri Temirbek Júrgenovtiń ákesi Qara Júrgenulynyń balýany bolǵan kórinedi. Qazir ǵylymı qyzmetkerler etikti zerttep jatyr, aldaǵy ýaqytta ekspozısııa qatarynan oryn alady», – deıdi oblystyq tarıhı ólketaný mýzeıiniń bólim meńgerýshisi Eńlik Ábilqasymova.
Balýanǵa arnaıy tigilgen saptama etiktiń qonyshy tizeni jabatyndaı uzyn ári keń tigilipti. Ishinde matamen astarlanǵan kıiz baıpaǵy bar. Tabany men ókshesi shegelenip bekitilgen. Etiktiń tabany – 44, al bıiktigi – 46 santımetr.
Kóneniń kózin kórgen qarııalar ertede «Qaranyń balýany» atanǵan Seráliniń ustalyǵyn da aıtyp otyrady eken. Urpaqtary qolynda mási, etik tigip, er shapqan balýan jasaǵan asadal men sandyq ta saqtalypty.
О́tken ǵasyr ortasyna deıin ómir súrgen Seráliniń etigi balasy Naǵashybekke qalypty. Jaýyryny jer ıiskemegen balýannyń talaı jeńisiniń kýágeri endi mýzeıdegi qundy jádigerler qataryn tolyqtyrady.
Qyzylorda
