KEGOC: turaqty ósý, strategııalyq ınvestısııalar

Kórsetkishtiń ósýi, qarjylyq turaqtylyq

«Elektr jelilerin basqarý jónin­degi kompanııa – «KEGOC» AQ bas­qarma tóraǵasy Nábı Aıtjanov keńes músheleri men shaqyrylǵan sarapshylar aldynda sóılegen sózinde kompanııa qyzmettiń barlyq negizgi baǵyttary boıynsha aıtarlyqtaı ósim kórsetip, alǵa qaraı qarqyndy jyl­jyp, elimizdiń energetıkalyq saıa­satynyń basymdyqtaryna saı da­myp kele jatqanyn atap ótti. Ne­gizgi kórsetkishtiń ósýi, jelilik ınfraqurylymdy damytý, tehnologııa­lyq jańarý, turaqtylyqqa baǵyttalǵan jobalar basty nazarda tur.

KEGOC 287 000 shaqyrymǵa jýyq joǵary kerneýli elektr jelilerin, 832 qosal­qy stansany basqarady. Kom­pa­nııa­nyń búkil el aýmaǵyn qamtıtyn 9 óńirlik fılıaly bar. Elektr energııa­sy arqyly tasymaldaý, tutyný-óndirý teńgerimin basqarý, elektr energııasynyń teńgerimsizdigin qarjylyq retteý, elektr qýatyn rezervteý, júıelik qyzmetterdi uıymdastyrý, energetıkalyq júıeniń turaqty jumysyn qamtamasyz etý syndy memleket, qoǵam úshin asa mańyzdy qyzmet túrlerimen turaqty, júıeli shuǵyldanady.

2024 jyly elimizde elektr energııa­syn tutyný 4,3%-ǵa artty, bul ózgeris KEGOC qyzmeti kóleminiń keńeıýine yqpal etti. Ulttyq elektr toraby (UET) arqyly jetkizilgen, paıdalanylǵan elektr energııasynyń jalpy kólemi 93,9 mlrd kVt saǵatty qurady – bul 2023 jylmen salystyrǵanda 30%-ǵa artyq.

Qarjylyq qorytyndy – turaqty­lyqtyń taǵy bir dáleli: kompanııanyń taza paıdasy 59,5 mlrd teńgege jetti (ótken jylǵyǵa qaraǵanda +37,1%). 2025 jyly bul kórsetkish taǵy 11%-ǵa artady dep kútilip otyr.

Senimdilikti qoldaý, utymdy paıdalaný

Basty mindet – UET-tyń úzdiksiz jumysyn qamtamasyz etý. 2025 jyly aǵymdaǵy óndiris deńgeıin 93,9 mlrd teńge deńgeıinde ustap turý úshin «KEGOC» AQ elimizdiń birqatar óńirle­rinde tutynýdyń ósýi jaǵdaıynda, tuty­ný­shylardy elektrmen senimdi jab­dyq­taýdy qamtamasyz etýge qatysty shyǵary­­­­latyn ónim kólemin arttyrý maq­satynda qýatty avtotransformatorlar­dy aýystyrý sharalaryna 22,8 mlrd teńge bóledi.

Jetiqara, Nura, Saryózek, Sastóbe negizgi qosalqy stansalarynda qýattylyq 860 MVA-ǵa artady. 2029 jyldyń sońyna deıin 18 nysandaǵy avtotransformatorlardy aýystyrý, jańǵyrtý jumysy qýattylyqty 1 837 MVA arttyrady.

Orta jáne uzaq merzimdi keleshekte «KEGOC» AQ iske asyrylǵan bas­tamalardyń tıimdiligin biriktirýge jáne energııa júıesiniń turaqty damýyn qamtamasyz etýge baǵyttalǵan birqatar aýqymdy ınfraqurylymdyq jobalardy iske asyrýdy josparlap otyr.

Serpindi jobalar

• Ońtústik aımaq jelisin kúsheıtý: uzyndyǵy 475 shaqyrym bolatyn 500 kV elektr jelisin salý «Soltústik–Ońtústik» tranzıtiniń ótkizý qabiletin 440 MVt-qa arttyrady. Jobany iske asyrý merzimi – 2027 jyldyń ortasyna deıin.
• Batys Qazaqstannyń energııa júıesin BEJ-ben biriktirý: 500 kV (604 km) jeli men qosalqy stansa salý batys óńirin qamtamasyz etý senimdiligin arttyryp, elimizdi energetıkalyq tuıyqtaýǵa negiz bolady. Jobanyń aıaqtalý merzimi – 2027 jyldyń sońy.
• «Soltústik–Ońtústik» turaqty tok jelisi: HVDC tehnologııasy bolashaq generasııany eskere otyryp, 2000 MVt-qa deıingi elektr qýatyn jetkizýdi qamta­masyz etedi. Aıaqtalý merzimi – 2029 jyl.
• Astanadaǵy 500 kV sıfrlyq qosalqy stansa: elordany elektrmen qamtamasyz etýdiń ekinshi syrtqy kózi jabdyqtaýdyń senimdiligin arttyrady, jańartylatyn energııa kózderin (JEK) ıntegrasııalaýǵa múmkindik beredi. Iske asyrý merzimi – 2028 jylǵa deıin.
• «Batys–Ońtústik» jobasy: turaqty tok jelisi eldiń energııa júıesiniń barlyq aımaqtaryn tuıyqtaı otyryp, batys pen ońtústik óńirlerdi baılanys­tyrady.

UET-ty damytýǵa basymdyq

KEGOC áleýmettik turaqtylyq boıynsha óz pozısııalaryn saqtap, qor toby kompanııalarynyń arasynda alǵashqy úshtikte tur. S&P halyqaralyq agenttiginiń ESG reıtıngi – 55 ball, ári bul kórsetkish ósip keledi. Kompanııa jasandy ıntellekt pen avtomattandyrýdy belsendi engizip jatyr – ishki úderisterdiń 49%-y sıfrlandyrylǵan. Aldaǵy maqsat – 2032 jyly bul kórset­kishti 90%-ǵa jetkizý.

«Artyp kele jatqan energııa tu­tyný deńgeıi men ásirese, jańarty­la­tyn generasııanyń qarqyndy damýy jaǵ­daıynda, jeliniń senimdiligi men tehno­logııalyq daıyndyǵy basty orynǵa shyǵady. KEGOC osy transformasııanyń ortasynda tur, eldiń bolashaq energııa júıesiniń negizin qalap jatyr», – dedi «Samuryq-Qazyna» AQ basqarýshy dırektory Eljas Otynshıev.

Keńes barysynda onyń músheleri men sarapshylar «KEGOC» AQ basqarma tóraǵasy N.Aıtjanovqa birqatar suraq qoıdy. Jalpy, kompanııa jumysyna oń baǵa berildi. Qatysýshylar kompanııa jobalarynyń el energetıkasyn damytýda mańyzdy ról atqaratynyn atap ótip, óz taraptarynan usynystar jasady. Onyń ishinde, óńirlermen ózara is-qımyldy kúsheıtý, kadr áleýetin damytý, sıfrlyq sheshimderdi keńeıtý qajettigi jóninde aıtyldy. KEGOC ókilderi aıtylǵan usynystardy aldaǵy jumysta eskerýge daıyn ekendikterin bildirdi.

Aıta ketý kerek, KEGOC quramdy damytý, qyzmetkerlerdi áleýmettik qoldaý baǵytynda da kóp jumys atqaryp keledi. Mamandardyń biliktiligin arttyrý baǵdarlamalary, jańa jabdyqtarmen jumys isteýge úıretý, kásibı sheberlik konkýrstary, sportpen aınalysýǵa jaǵdaı týǵyzý, jaqsy áleýmettik paket, qyzmetkerlerdiń otbasylaryna qamqorlyq jasaý, ardagerler men zeınetkerlerge qurmet, qoldaý kórsetý – áleýmettik baǵytta atqarylyp jatqan jumystardyń bir parasy ǵana. Bul taraptaǵy jumystar aldaǵy ýaqytta da júıeli jalǵasyn tabady.

Qoryta aıtqanda, elimizdiń energetı­ka­lyq qaýipsizdigin qamtamasyz etetin strate­gııalyq mańyzdy kásiporyn – KEGOC kompanııasynyń jarqyn bola­shaq­ta da zamanaýı tehnıkalyq, ekonomı­kalyq, ekologııalyq syn-qaterlerge tótep bere otyryp, barlyq ozyq úlgili stan­darttarǵa saı, senimdi jumys isteı beredi deýge tolyq negiz bar.