Foto: primeminister.kz
Premer-mınıstr óziniń alǵy sózinde strategııalyq áriptestik Qazaqstan-Italııa memleketteri basshylarynyń kúsh-jigeri arqasynda qarqyndy damyp kele jatqanyn atap ótti. Energetıka, mashına jasaý, hımııa ónerkásibi, farmasevtıka, AО́K jáne basqa da salalarda tabysty yntymaqtastyq ornaǵan.
Byltyr ekijaqty saýda kólemi 25%-ǵa artyp, $20 mlrd-qa jýyqtady, onyń ishinde otandyq taýarlar eksporty $18 mlrd-tan asqan. Osy jyldyń birinshi toqsanynyń qorytyndysy boıynsha taýar aınalymy $4,4 mlrd-ty quraǵan. Sondaı-aq Italııa Eýropalyq Odaq elderi arasynda Qazaqstannyń eń iri ınvestorlarynyń bestigine kiredi. Nebári 20 jyl ishinde Qazaqstan ekonomıkasyna munaı-gaz salasy, «jasyl» energetıka, mashına jasaý jáne AО́K salasyndaǵy jobalardy júzege asyrýǵa $7,6 mlrd ıtalııalyq ınvestısııalar salyndy.
Premer-mınıstr Úkimet ıtalııalyq ınvestorlarǵa birlesken jobalardy júzege asyrýda jan-jaqty kómek kórsetýge daıyn ekenin basa aıtty.
«Qazaqstan Úkimeti elimizdiń ınvestısııalyq tartymdylyǵyn arttyrý boıynsha júıeli jumys júrgizip keledi. Bizdiń zańnamada ınvestorlar úshin salyqtyq jáne kedendik jeńildikterdi, zattaı granttar men ınfraqurylymdy damytýdy qoldaýdy qosa alǵanda, yntalandyrýlar qarastyrylǵan. Sonymen qatar biz uzaqmerzimdi seriktestikti qamtamasyz etý úshin ınvestorlardyń pikirleri negizinde qoldaý sharalaryn únemi jetildirýge tyrysamyz. Italııalyq bıznestiń Qazaqstandaǵy qatysýyn keńeıtýge jáne ekonomıkanyń basym sektorlaryndaǵy birlesken jobalarǵa belsendi qatysýǵa shaqyramyz», dep atap ótti Oljas Bektenov.
Bıznes-forým qorytyndysy boıynsha ekonomıkanyń túrli salalaryndaǵy kooperasııa týraly birqatar qujatqa qol qoıylady dep josparlanǵan.
