Sýret: egov.kz
Eńbek jáne halyqty áleýmettik qorǵaý mınıstrligi baspasóz qyzmetiniń málimetinshe, 2025 jylǵy 1 mamyrda járdemaqy alýshylar sany 540,4 myń adam bolsa, buǵan qosa asyraýshysynan aıyrylǵan 196,7 myń adamǵa tólem berilgen.
Múgedektigi boıynsha memlekettik áleýmettik járdemaqylardyń mólsheri múgedektiktiń tobyna, syrqatynyń sebebine qaraı belgilenedi. Qarjy «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady.
Asyraýshysynan aıyrylý jaǵdaıynda memlekettik áleýmettik járdemaqylardyń mólsheri qaıtys bolǵan asyraýshynyń qamqorlyǵyndaǵy adamdardyń sanyna, qaıtys bolý sebepterine, eń tómen kúnkóris deńgeıine qatysty.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda tólem aýdarylady. Bıyl 91,7 myń adam eńbek etý qabiletinen aıyrylǵandyqtan áleýmettik tólem alǵan. 63,5 myńǵa jýyq otbasyna asyraýshysynan aıyrylýyna baılanysty áleýmettik tólem berilgen.
Tólemderdiń mólsheri keıingi 2 jyldaǵy MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffısıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili men tabysty aýystyrýyna qaraı belgilenedi.
Bul tólemder respýblıkalyq bıýdjetten tólenetin uqsas járdemaqylarǵa qosymsha beriledi.
Múgedektigi men asyraýshysynan aıyrylý jaǵdaıynda memlekettik áleýmettik járdemaqylardyń mólsheri kóbeıdi. Bıylǵy 1 qańtardan bastap eń tómen kúnkóris deńgeıiniń ulǵaıýyna baılanysty 6,5%-ǵa ósti. Úkimettiń sheshimimen eńbekke qabilettiliginen, asyraýshysynan aıyrylǵanda MÁSQ-dan beriletin tólemderdiń mólsheri de 6,5%-ǵa artty.
Máselen, bıyl aýrýdan múgedektigi boıynsha MÁJ mólsheri 1-top úshin – 101 702, 2-top úshin – 81 362, 3-top úshin – 55 474 teńgege jetti. Eńbekke qabilettiliginen aıyrylǵandarǵa áleýmettik tólemderdiń ortasha mólsheri 70 124 teńge bolsa, asyraýshysynan aıyrylǵandarǵa 72 524 teńge kóleminde qarajat aýdarylady.
