2022 jyldyń qyrkúıeginde Memleket basshysy Q.-J. Toqaev óziniń Qazaqstan halqyna Joldaýynda bolashaq urpaqtyń ál-aýqatyn arttyrýǵa, jastardyń bilim alýyn tabysty bastaý jáne qoldaý úshin jaǵdaı jasaýǵa baǵyttalǵan «Ulttyq qor – balalarǵa»jobasyna bastama berdi.
Osy baǵdarlama sheńberinde 2024 jylǵy 1 qańtardan bastap 18 jasqa tolmaǵan qazaqstandyq balalarǵa týylǵan kezde avtomatty túrde ashylǵan derbes shottarǵa jyl saıyn Ulttyq qordyń ınvestısııalyq kirisiniń 50%-y aýdarylady. Eger 2024 jyly ár balaǵa 100,52 AQSh dollary eseptelse, 2025 jyly esepteý somasy 129,38 AQSh dollaryna deıin ósti. Bul rette alýshylar sany da ósýde – 2024 jyly 304 815 myń baladan 2025 jyly 324 430 myńǵa deıin.
Kámeletke tolǵannan keıin balalar jınaqtalǵan aqshany turǵyn úı nemese joǵary bilim úshin alǵashqy jarnany tóleý maqsatynda paıdalana alady. Mundaı ashyq tetik ata-analardyń nemese balalardyń qamqorshylarynyń olardy aǵymdaǵy jumsaý qaýpin joıady.
Osylaısha, memleket eresek ómirge qarjylyq jastyqpen kiretin jas qazaqstandyqtardyń urpaǵyn qalyptastyrady, bul ómir sapasyn jaqsartýǵa yqpal etedi jáne bolashaqta jas qazaqstandyqtarǵa senimdilik beredi.
Qazaqstan ekonomıkalyq ósý draıveri retinde talantqa bás tigýde, sondyqtan Prezıdent Q.-J. Toqaev 2023 jyly Qazaqstan halqyna Joldaýynda «Keleshek» biryńǵaı erikti jınaqtaý júıesine bastamashy boldy, al 2025 jyldyń basynda tıisti zańǵa qol qoıdy. Bastamanyń maqsaty – óskeleń urpaqqa sapaly bilim alýǵa kepildik berý bolyp tabylady. Erikti joba bola otyryp, «Keleshek» bólingen memlekettik granttarǵa qosymsha qarajat jınaýǵa múmkindik beredi.
Memlekettik qoldaý tetigi retinde bul baǵdarlama 5 jastan asqan balalarǵa aqsha qarajatyn turaqty jınaqtaýǵa múmkindik beredi. 18 jasqa tolǵannan keıin balalar tehnıkalyq jáne kásiptik, joǵary jáne joǵary oqý ornynan keıingi bilim berýdi qosa alǵanda, Qazaqstanda jáne shetelde bilim berý qyzmetterin jınaqtalǵan qarajatpen tóleı alady, sondaı-aq turǵyn úı úshin paıdalana alady. Buǵan qosa, balalar jınaqtalǵan qarajatty týystarynyń (týǵan baýyrlary) qatarynan úshinshi tulǵalarǵa aýdara alady.
Jınaqtaý úshin memleket 60 AEK (2025 jyly 235 920 teńgeni quraıdy) jáne jetim balalar úshin – 120 AEK (471 840 teńge) mólsherinde bastapqy bilim berý kapıtalyn, sondaı-aq 5-7 paıyz mólsherinde memlekettik syıaqynyń jyl saıynǵy tólemin jáne ekinshi deńgeıdegi banktiń syıaqysyn nemese ómirdi saqtandyrý boıynsha kompanııanyń ınvestısııalyq tabysyn bóledi. Ata-ana nemese qamqorshy, óz kezeginde, halyqtyń áleýmettik osal toptaryndaǵy balalar úshin keminde 12 AEK jáne balalardyń qalǵan sanattary úshin 24 AEK mólsherinde jyl saıynǵy eń tómengi jarna engizedi.
Osylaısha, bizdiń elimizdegi demografııalyq ósý aıasynda «Keleshek» baǵdarlamasy «Ulttyq qor – balalarǵa» jobasymen birge qoljetimdi bilim berýge, qolaıly kásipti ıgerýge nemese turǵyn úı problemasyn sheshýge múmkindik beredi, sol arqyly ata-analarǵa qarjylyq júktemeni azaıtady jáne balalarǵa bolashaqta senimdilik usynady.
