Sýretti túsirgen – Aqadil Rysmahan
Toǵyz joldyń torabynda ornalasqan Shý qalasynda lokomotıv jóndeýmen aınalysatyn alǵashqy tehnıkalyq qyzmet kórsetý deposy ashyldy. Depo jylyna 1 500-den astam lokomotıv jóndeýge qaýqarly. Kólik salasyndaǵy jahandyq kóshbasshy kompanııalar sanatyna engen «Alstom» ujymy jańa depony salý úshin 3,5 mlrd shamasynda ınvestısııa quıǵan. Osylaısha, fransııalyq kompanııa araǵa 37 jyl salyp elimizde tehnıkalyq qyzmet kórsetý kásipornyn ashyp, jumysty jandandyrýǵa bel býyp otyr.
Derekke súıensek, kompanııa ókilderi zamanaýı úlgide boı kótergen sıfrlyq depo qurylysyn eki jyl bederinde aıaqtaǵan.
«Jańa nysannyń ashylýy Qazaqstan men Fransııa arasyndaǵy iskerlik baılanystyń órkendegenin kórsetedi. Bizdiń kompanııa «Qazaqstan temir joly» kompanııasymen 15 jyl boıy úzdiksiz jumys istep keledi. Jańadan ashylǵan tehnıkalyq qyzmet kórsetý deposy – eki el arasyndaǵy berik baılanystyń jemisi. Osy oraıda Qazaqstan bıligi tarapynan ınvestorlarǵa barynsha jaqsy jaǵdaı qarastyrylǵanyn aıta ketken lázim. Qazir Qazaqstanda jalpy quny 25 mlrd teńgeni quraıtyn 4 jobany iske asyrý boıynsha jumys istep jatyrmyz», deıdi «Alstom» kompanııasynyń Batys jáne Ortalyq Azııa boıynsha basqarýshy dırektory Jerom Boıe.
О́ńir basshysy Erbol Qarashókeevtiń aıtýynsha, óńirge tikeleı sheteldik ınvestısııa tartý jumysy jalǵasa beredi. Ásirese jańa óndiris oryndaryn ashý úshin birneshe jobany júzege asyrýdyń tetikteri qarastyrylǵan.
«Memleket basshysynyń tapsyrmasyna sáıkes, óńirde aýqymdy ınvestısııalyq jobalar júzege asyrylyp jatyr. Keıingi jyldary birneshe jańa óndiris oshaǵy iske qosylyp, jergilikti halyqty jumyspen qamtý sharalaryna basymdyq berildi. Aldaǵy úsh jylda jalpy quny 3,7 trln teńgeni quraıtyn 62 ınvestısııalyq jobany júzege asyrýǵa nıettimiz. Osy jyldyń ózinde 175,2 mlrd teńgege baǵalanǵan 30 joba iske qosylyp, myńnan astam jańa jumys orny quryldy. «Jibek joly» arnaıy ekonomıkalyq aımaǵy iri ınvestısııalyq jobalar alańyna aınaldy. Búgin iske qosylǵan «Alstom kazakhstan» kompanııasynyń tehnıkalyq qyzmet kórsetý deposy Shý aýdanynyń strategııalyq mańyzyn arttyryp, elimizdiń temirjol ınfraqurylymyn damytýǵa, tranzıttik áleýetin nyǵaıtýǵa zor úles qosatynyna kúmán joq», deıdi E.Qarashókeev.
Mamandardyń aıtýynsha, Shý qalasynda ornalasqan jańa depo KZ4 jáne KZ8 elektrovozdaryna qyzmet kórsetýge arnalǵan. Munda aıyna júzden astam lokomotıvti jóndeýge múmkindik bar.
«Ár lokomotıvti jóndeý úshin depo qyzmetkerleri shamamen 12 saǵat ýaqyt jumsaıdy. Aldaǵy birneshe jylda mundaı servıstik depolar Almaty, Astana qalalarynda jáne Arysta ashylady. Bul óz kezeginde sala jumysyn ilgeriletýge yqpal etedi. Sondaı-aq jańa jumys oryndaryn qurýǵa da múmkindik beredi», deıdi kompanııanyń qyzmet kórsetý boıynsha dırektory Oljas Ahmetov.
Jańa kásiporyn jumysy halyqaralyq standartqa negizdelgen. Munda ónerkásiptik jáne ekologııalyq qaýipsizdik talaptary qatań saqtalady.
Jambyl oblysy,
Shý qalasy
