Shyǵarmashylyq keshti Qyrǵyz Respýblıkasy Ulttyq jazýshylar odaǵynyń múshesi Jamalkúl Sabaeva júrgizip otyrdy. Aldymen Reseı memlekettik kitaphanasynyń áleýmettik-mádenı baǵdarlamalarynyń úılestirýshisi, ónertanýshy Margarıta Mkrtycheva sóz aldy.
«Reseı memlekettik kitaphanasy – elimizdegi basty ári Eýropadaǵy tańdaýly iri kitaphanalardyń biri. Osynaý oqyrmany kóp úlken kitaphanada qazaq aqyny Marfýǵa Bektemirovany eske alýǵa arnalǵan shyǵarmashylyq keshtiń ótýi – eleýli oqıǵa. Bul ómirden erte ketken aqyn esimin qurmettep, onyń shyǵarmalaryn týǵan jerinen tysqary jerlerge de keńinen nasıhattaý bolyp sanalady. Osy ıgi istiń júzege asýyna barynsha janashyrlyq tanytyp, uıytqy boldyq», dedi ol.
Al Reseıdegi Qazaqstan elshiliginiń keńesshisi Erkebulan Bekturǵanov aqynnyń shyǵarmashylyǵyna toqtaldy.
«Marfýǵa Bektemirovanyń syrshyl óleńderin jas kezimizden oqydyq. Tek ókinishtisi, aqynnyń aramyzda joqtyǵy. Aqyndy eske alý keshi Máskeý qalasynyń tórinde ótkenine qýanyshtymyz. Bul – elimiz úshin mereı, maqtanysh. Sondaı-aq eki el arasyndaǵy dostyq qarym-qatynasty nyǵaıtyp, mádenı baılanystardy jandandyrady», dedi ol.
Máskeý kásibı ádebıetshiler odaǵynyń, Reseı Jazýshylar odaǵy Máskeý oblystyq uıymynyń múshesi Aınur Bekbolotova «Marfýǵa Bektemirova shyǵarmalarynyń arqaýy», «Kaıryktar kazynasy – Moskovskıe napevy» ádebı birlestiginiń múshesi Zamıra Zaılıdınova «Marfýǵa Bektemirovanyń aýdarmashylyq qyzmeti» degen taqyryptarda baıandama jasady. «Orys-vetnam dostyǵy» qoǵamynyń tóraǵasy Fam Dyk Haı Marfýǵa Bektemirova óleńderin tyńdaı otyryp, jyly áser alǵanyn aıtty.
Reseı Jazýshylar odaǵy Máskeý oblystyq uıymy basqarmasynyń múshesi, jazýshy Irına Ovcharenko, «Iа delovaıa jenshına» jýrnalynyń bas redaktory Gúljan Davletbekova, «Arýý dúınó» ádebı birlestiginiń jetekshisi Aıjan Mamasadyqova aqyn óleńderin orys, qazaq, qyrǵyz tilderinde oqydy.
Azııa men Afrıka elderi Assambleıasy ádebı keńesiniń tóraǵasy, «LIfft» qorynyń prezıdenti, ádebıet synshysy Margarıta Al búgingi tańda aramyzda joq bolsa da Marfýǵanyń shyǵarmashylyǵy ózine jaqyn kórinetinin tilge tıek etip, onyń názik sezimge toly jyrlaryn ózge tilge aýdarýǵa shaqyrdy.
Reseı jurtshylyǵyna Marfýǵa Bektemirovanyń esimi jaqsy tanys. «Edınaıa Rossııa» partııasy men Reseı Federasııasy Memlekettik Dýmasynyń qoldaýymen aqynnyń «Belyı parýs mechty» kitaby jalpy taralymy 10 myń danamen shyqty. Bir top óleńderi «Molodaıa gvardııa» jýrnalynda jaryq kórdi.
«Marfýǵa Bektemirovanyń Máskeýde shyqqan «Belyı parýs mechty» degen kitaby unady. Qazaqshasy «Armannyń aq jelkeni» bolady ǵoı. Az ǵana ǵumyr keshken talantty aqynnyń armany oryndalsa eken, Reseı jurtynyń aldynda bedelimiz kóterilsin dep is-sharany uıymdastyrýdyń jaýapty bir bóligin óz moınyma aldym. Bul, bir jaǵynan, Qazaq eliniń abyroıy ǵoı. О́zim Orynbor jerinde týsam da, atajurtqa qaraılap, baýyrlaryma tilektes bolyp júremin», dedi «Sankt-Peterbýrgtegi Orynbor qazaqtarynyń jerlestigi» qoǵamdyq birlestiginiń prezıdenti Aıgúl Irısheva.
Ádebı keshti «Kaıryktar kazynasy – Moskovskıe napevy» qoǵamdyq birlestigi, «Sankt-Peterbýrgtegi qazaqtardyń Orynbor qazaqtarynyń jerlestigi», «Gorıachee ozero» áleýmettik-mádenı jobalardy damytý jáne dástúrli otbasylyq qundylyqtardy saqtaý jónindegi birlestigi, «Bırge» medıaresýrsy Eýrazııa men Afrıka halyqtary Assambleıasynyń jáne Qazaqstandaǵy Halyq dıplomatııalyq Halyqaralyq Dostastyǵynyń qoldaýymen uıymdastyrdy. Sondaı-aq keshti ótkizýge elimizdiń Syrtqy ister mınıstrligi, Qazaqstannyń Reseıdegi elshiligi qoldaý kórsetti.
