Seriktestik mamandary birden mal tuqymyn asyldandyrýǵa mán bergen. Jergilikti jerdiń tuqymy azǵan malynan alar tabys jarytymsyz bolýy ábden múmkin. Asyl tuqymnyń asa beretindigi aqıqat. Osylaısha, qabyrǵalarymen keńesip baryp tańdaý qazaqtyń aqbasy men qalmaq sıyryna túsken. Aqbas – tól malymyz, al qalmaq sıyrynyń syry tosyndaý. Mal baqqan qaýymnyń qaperinde júrsin dep sıpattamasyn aıta ketken de durys bolar. Bul – iri qaranyń etti tuqymy. Tabıǵı suryptaý arqyly kezinde Mońǵolııa jerinde ósirilgen. Qysy-jazy jaıylymda baǵylǵan. Tuzy betine shyǵyp jatatyn qýań dalanyń aýa raıyna ábden beıimdelgen, kúı tańdamaıdy. Som deneli, aıaqtary myqty, bulshyq etteri óte jaqsy damyǵan. Terisi qalyń bolǵandyqtan, qara qarǵanyń mıy qaınaıtyn ystyqta maldyń mazasyn alatyn masa-sonany, shybyn-shirkeıdi eleı bermeıdi. Shoqtyǵy bıik. Buqasynyń tirideı salmaǵy 800 kılodan asyp jyǵylady. Jaqsylap kútse tana torpaǵy 18 aıda 500 kıloǵa jetedi. Sıyrynyń súti de maıly.
Asyl tuqymdy maldyń dárýmenderi de úzilgen emes. Jumysyn bir jolǵa qoıǵannan keıin seriktestik halyqaralyq sertıfıkatqa ıe boldy. Mal óz tóli esebinen ósiriledi. Jiligine maı bitip, salmaǵy tolysqan soń qasaphanaǵa toǵytylyp, dámi til úıiretin semiz et óńdeý keshenine ótkiziledi. «Jańa Berekeniń» bordaqylaý alańynda 10 myń basqa jýyq qoı semirtiledi. Mal azyǵyn seriktestiktiń ózderi daıyndaıdy. Qysy-jazy saqtaıtyn qoımalary daıyn. Baıaǵydaı aıyr ustap júrgen eshkim joq. Mal azyǵyn daıyndaıtyn sehta san qıly dárýmeni qosylyp ázir bolǵan azyqty tehnıkamen taratady. Malsaq qaýymnyń aıtýyna qaraǵanda, isine bereke bitý úshin mal azyǵyn ózderi daıyndaýy meılinshe mańyzdy. Sondyqtan seriktestik júgeriden bastap birneshe daqyl túrin ósirip, qysqa qamdanýdy qapysyz jolǵa qoıǵan.
2023 jyly respýblıkalyq «Altyn sapa» syılyǵyna ıe boldy. Et ónimderin saqtaıtyn muzdatqyshtaryna 26 tonna ónim syıady. Keshen zamanaýı qurylǵylarmen tolyq jabdyqtalǵan. Onyń ishinde aýstrııalyq «Laska» qurylǵysy da bar. Seriktestik qoı sharýashylyǵyn órkendetýge bet buryp otyr. Oǵan barlyq jaǵdaı bar. Babyn tapqan soń baǵymy jaqsy maldyń basy da kóbeımeı me? «Stolıchnaıa trapeza» brendimen satylatyn shujyqtyń birneshe túri jáne óńdelgen et elimizdegi 70 saýda ornynda satylady eken.
Kompanııada júzge jýyq adam jumys isteıdi. Ortasha tabystary 200 myń teńge tóńireginde. Shujyq sehy jylyna 270 tonna ónim shyǵarady. Et óńdeıtin sehtyń ónimi 900 tonna tóńireginde. Bul jerde kólem ǵana emes, sapanyń joǵary ekenin de aıta ketýimiz kerek.
«Bolashaqtaǵy maqsatymyz – shetelderdiń saýda oryndaryna óz ónimimizdi jetkizý. BAÁ, Saýd Arabııasyndaǵy halyqaralyq kórmege qatysýǵa nıettenip otyrmyz», deıdi «Altyn qazyq» kompanııasy dırektorlar tobynyń orynbasary Qonysbek Nurǵazın.
Aqmola oblysy,
Ereımentaý aýdany
