«Bizdiń seriktesimiz IýNISEF sıfrlyq tehnologııalardy qoldaný aıasynda óte mańyzdy zertteý júrgizdi. Zertteý nátıjesine sáıkes, balalar ınternetti alǵash ret shamamen 5 jasynan bastap paıdalana bastaıdy», dedi Dınara Zakıeva Teen accounts jobasy men jastardyń onlaın qaýipsizdigine arnalǵan is-sharada.
Balalar men jasóspirimderdiń shamamen 66%-y ınternetti áleýmettik jelilerde qarym-qatynas jasaý úshin qoldanady.
«Sonymen qatar, saýalnamaǵa qatysqandardyń 21%-y kıberbýllıngke ushyraǵanyn, al 20%-y áleýmettik jelilerde beıtanys adamdardy dostar qataryna qosqanyn aıtty. Bul óte alańdatarlyq kórsetkishter, sebebi tehnologııalar kún saıyn damyp jatyr, al biz qaýipsizdikti qamtamasyz etý úshin qandaı quraldardy paıdalaný qajettigin túsinýimiz kerek», dep atap ótti Zakıeva.
Onyń aıtýynsha, bul baǵytta Qazaqstan halyqaralyq sıfrlyq platformalarmen, sonyń ishinde Meta kompanııasymen belsendi yntymaqtastyq ornatqan.
«Biz onlaın qaýipsizdiktiń negizderi týraly túsindiretin beınematerıaldar jasaýdy uıǵardyq. Bul jumysty byltyr bastaǵanbyz. Sonymen qatar biz negizgi múddeli taraptar — mınıstrler, áleýmettik jelilerdiń ókilderi arasyndaǵy dıalogtardy belsendi túrde bastap kettik. Maqsat — ózara kelisim tabý», dep qosty QR bala quqyqtary jónindegi ýákil.
Zakıeva mundaı is-sharalardyń, sonyń ishinde búgingi kezdesýdiń, jastarmen tikeleı dıalog úshin mańyzdy ekenin atap ótti.
