Aýqymdy aqparattyq joba Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» ekologııalyq aksııasyn keńinen nasıhattaýǵa baǵyttalǵan. Telemarafon barysynda elimizdiń túkpir-túkpirinde qolǵa alynǵan ekologııalyq jobalar, eriktilerdiń úlesi, qorshaǵan ortany qorǵaýǵa baǵyttalǵan memlekettik baǵdarlamalar men azamattyq qoǵam ókilderiniń bastamalary qamtyldy.
Esil ózeniniń jaǵasyndaǵy kóshpeli stýdııadan habar taratylyp, óńirler men shetelden tilshiler tikeleı efırge shyqty. Sondaı-aq belgili ekologter, tabıǵat janashyrlary men sala mamandary pikir bildirip, qorshaǵan ortany saqtaýdyń mańyzdylyǵyna toqtaldy.
Ekologııa jáne tabıǵı resýrstar mınıstri Erlan Nysanbaev tikeleı efırde «Taza Qazaqstan» jobasy aıasynda atqarylǵan jumys jóninde suhbat berdi. Ol ekologııalyq aksııanyń eldi biriktirgen biregeı bastama ekenin erekshe atap ótti. Búginge deıin «Taza Qazaqstan» aksııasyna 1,4 mıllıonnan astam adam qatyssa, onyń basym kópshiligi – jastar.
«Kıeli meken», «Kıeli jer», «Kıeli ólke», «Móldir bulaq» sııaqty ıgi bastamalar tek eldi biriktirip qana qoımaı, patrıottyq sezimdi kúsheıte tústi. «Taza Qazaqstan» aksııasy naýqandyq, bolmasa maýsymdyq qana shara emes. Aǵash otyrǵyzý, aýlalardy tazalaý, kólderdi tazalaý sııaqty jumys áli de jalǵasyp jatyr. Ekoaksııaǵa qarııalar, tipti baldyrǵandar da belsene atsalysty», dedi mınıstr Erlan Nuralyuly.
Senat depýtaty Janna Asanova «Taza Qazaqstan» aksııasy qoǵam úshin qashanda mańyzdy ári durys baǵyt ekenin basa aıtty.
«Ekologııa – álemdegi ózekti máseleniń biri. Sheshimin tabý qıynǵa soǵyp otyr. Qoqys máselesiniń ýshyǵýyna birden bir sebep – qurylys salasyndaǵy júıesizdik. Jańa nysandar salyp jatqan kásipkerlerdiń ekologııalyq jaýapkershilikti sezinýdegi túısigi tym tómen. Qurylys kezinde ártúrli janǵysh ári zııandy qaldyqtar kóptep shyǵarylady. Talap buzǵandarǵa aıyppul salynsa da, jaǵdaı máz emes. Sondyqtan «Taza Qazaqstan» aksııasynyń jarııalanýy – óte oryndy bastama», dedi senator.
Budan bólek, tikeleı efırde Ile-Alataýy ulttyq parki aýmaǵyn, Kaspıı teńiziniń, Balyqtykól, Zerendi, Kólsaı kólderiniń jaǵasyn tazartý jumysy týraly arnaıy materıaldar kórermen nazaryna usynyldy. Qyzylorda oblysy Qazaly aýdanynda aýmaǵy 19 ga bolatyn alleıa men Atyraýda Jaıyq jaǵasyndaǵy saıabaqtyń, Almatyda «Jasyl el» eńbek jasaǵynyń kezekti maýsymynyń ashylýy tikeleı efırde kórsetildi.
Igi is-shara barysynda ekologııalyq mańyzdy máseleler kóterilip, ózekti taqyryptarǵa qatysty suhbattar júrgizildi. Onyń ishinde Kaspııdiń jaǵasyndaǵy bes memlekettiń teńizdiń ekologııasyn jaqsartý turǵysynda qabyldap jatqan sharalary, Qazaqstan men Daǵystan mamandarynyń sý aıdynynyń tartylýyn birlesip zertteýi jónindegi taqyryptar qamtyldy.
El aýmaǵyndaǵy «Taza Qazaqstan» jobasy sheńberinde qoqystan tazartý, senbilik jumystarynan bólek, kógaldandyrýǵa da erekshe kóńil bólindi. Memleket basshysy Qasym-Jomart Toqaev 2027 jylǵa deıin orman alqaptaryna 2 mlrd aǵash otyrǵyzýdy tapsyrdy. Búginde orman alqaptaryna 1 mlrd 369 mln, eldi mekenderge
15,7 mln túp aǵash egilgen. Kóshpeli stýdııaǵa suhbat bergen Ekologııa jáne tabıǵı resýrstar mınıstrliginiń basqarma basshysy Azamat Ábýov keleshekte de kóshet egý qarqyndy júrgiziletinin aıtty.
Tikeleı efırdegi telemarafon «Ashyq alań» baǵdarlamasynyń «Ekologııalyq mádenıet» taqyrybymen qorytyndylandy. Spıkerler qoǵamdaǵy ekomádenıetti qalyptastyrý jóninde oı órbitti. Onyń ishinde qoqysty suryptaý, qaıta óńdeý oryndaryn ashý máseleleri kóterildi. «Jasyl damý» AQ búginge deıin 366 mlrd teńgeni quraıtyn 64 ınvestısııalyq jobany bekitken. Bul qarajat qaıta óńdeý zaýyttaryn salý, suryptaý oryndaryn ashýǵa bólinedi. Telemarafon barysynda suhbat bergen «Jasyl damý» AQ tóraǵasynyń orynbasary Danııar Dosymbekov negizgi basym baǵyttarǵa toqtaldy.
«Jasyl damý» AQ – memlekettik uıym. Ekologııalyq kodekste kózdelgen 15 baǵytqa qarjy jumsaıdy. Úkimettiń ınvestısııalyq shtaby arqyly qazirde 64 joba bekitilgen», dedi D.Dosymbekov.
Respýblıkalyq telemarafon aıasynda ekologııalyq aksııalardy qoldaý, qorshaǵan ortany qorǵaý máselesi jan-jaqty talqylandy. Spıkerler tabıǵatty aıalaý, qorǵaý, ekomádenıetti qalyptastyrýdyń mańyzdylyǵyn ár qyrynan qozǵap, qashanda jumyla kóterse, júk jeńil soǵatynyn basa aıtty.
