Sýret «Egemen Qazaqstannyń» arhıvinen alyndy
Birinshi kezeńniń qorytyndysynda AQSh eń az daýys jınap, ekinshi kezeńge Qazaqstan men Fransııa ótti. Fınaldyq daýys berý nátıjesi kelesideı boldy: Qazaqstan – 54,68%, Fransııa – 45,32%. Osylaısha, elimiz tarıhta tuńǵysh ret álemdik basty týrnırdi qabyldaıtyn boldy. 2028 jylǵy álem chempıonaty Japonııanyń Fýkýoka qalasynda ótedi. 2029 jyly álem birinshiligin Brazılııanyń Rıo-de-Janeıro qalasy qabyldaıdy.
Atalǵan sport túrimen álemde mıllıondaǵan adam shuǵyldanady. Bir ǵasyrlyq tarıhy bar ústel tennısi búginde olımpıadalyq sport túri bolyp esepteledi.
Elimizdiń álemdik dodany ótkizý mártebesine ıe bolýy teginnen-tegin emes. Ústel tennısi – josparly túrde damyp kele jatqan buqaralyq, qoljetimdi sport túri. Respýblıka kólemindegi iri qalalardyń barlyǵynda ústel tennısi ortalyqtary ashylǵan. О́ńirlerde materıaldyq-tehnıkalyq bazany nyǵaıtýdyń arqasynda ústel tennısimen shuǵyldanatyndar sany ósip, oblys pen aýdan deńgeıindegi jarystardyń sany artty. Keıingi kezeńde aldyńǵy qatarly sportshylarymyz elimizden bólek, halyqaralyq bedeldi arenalarda sátti óner kórsetip júr.
Ústel tennısiniń belsendi damýy Qasym-Jomart Toqaev Federasııa prezıdenti bolyp saılanǵannan keıin baıqaldy. Memleket basshysy Ulttyq ústel tennısi federasııasyn 13 jyldan asa basqarǵan ýaqytta elimizde bul sport túri aıtarlyqtaı deńgeıge kóterildi. Statıstıkalyq málimetterge súıensek, búginde elimizde ústel tennısimen 200 myńnan astam adam aınalysady. Onyń ishinde jeti myńǵa jýyǵy turaqty túrde shuǵyldanady.
Prezıdent Qasym-Jomart Toqaev oqýshy kezinde ústel tennısinen sport sheberligine úmitker atanǵan. AQSh-tyń burynǵy Prezıdenti Barak Obama ústel tennısiniń naǵyz sheberi bolǵan. Álemdik fýtbol oıynynyń jaryq juldyzy Krıshtıaný Ronaldý da osy sport túrin ómirlik serigi etken. Kásibı boksshylardyń kópshiligi osy oıyn arqyly shapshań qımyldaý tásilderin jetildirip otyrady eken. Ústel tennısiniń adam aǵzasyna jaǵymdy áseri mol. Ásirese Qytaı halqy shaǵyn taqtadaǵy jarystyń jaı ǵana oıyn emes, jyldam oılaý saıysy ekenin jaqsy paıymdaǵan. Sondyqtan bul sport túrin mektep baǵdarlamasyna engizgen. Ústel tennısimen shuǵyldanǵan balanyń deni saý bolyp, ózin sergek sezinedi ári sabaq úlgerimi jaqsarady. Bul oıyndy buqaralyq maqsatta damytqan Qytaı eliniń densaýlyq pen sportta qanshalyqty alǵa ketkeni belgili. Olar ústel tennısi arqyly ult saýlyǵyn nyǵaıtýǵa bolady degen berik senimde.
Ústel tennısi – shapshańdyqty, eptilikti, zeıindilikti damytatyn, dene men aqyl-oı úılesimin talap etetin, kez kelgen jastaǵy adam oınaı alatyn sport túri. Aýlada, mektepte, mádenıet úılerinde uıymdastyrýǵa ońaı, kóp qarjy men oryn talap etpeıdi. Ony damytý mańyzy sporttyq jetistikpen ǵana emes, halyq densaýlyǵy men jastar tárbıesimen de tyǵyz baılanysty. Balalar men jasóspirimderdiń ıntellektýaldyq, fızıkalyq damýyna jaqsy áser etedi. Qozǵalys az qoǵamda densaýlyqty nyǵaıtyp, aýrý-syrqaýdyń aldyn alýǵa kómektesedi.
Elimiz kóleminde ústel tennısinen túrli týrnır turaqty ótip turady. Sonyń biri – osy senbi, jeksenbi kúnderi Astana, Qaraǵandy qalalarynda ótetin elimizdiń ashyq komandalyq chempıonatynyń II týrynyń matchtary. Saıystar sýper, ekinshi, úshinshi lıgalar boıynsha uıymdastyrylady. Biz bul oıyndardyń qorytyndysy jóninde arnaıy jazatyn bolamyz.
