Rýhanı shara Dıdahmet Áshimhannyń shyǵarmashylyǵy men ómir jolyna arnalǵan konferensııamen bastalǵan. Odan keıin aqyn-jazýshylar men aýdan jurty Qalıhannyń aýyly – Topqaıyńnyń ór jaǵynda uıymdastyrylǵan jyr keshinde bas qosty.
Shytyrlap janǵan alaý aınalasyndaǵy erekshe keshke memlekettik keńesshi Erlan Qarın, oblys ákimi Nurymbet Saqtaǵanov, Abaı oblysynyń ákimi Berik Ýálı qatysty.
«Tór Altaı Qalıhany men Dıdahmetin jyrlaıdy» respýblıkalyq festıvalinde 12 aqyn jyrdan shashý shashty.
It tumsyǵy ótpes ormandy betkeıden ary assań, jarqyrap Búrkit shyńy kóriner edi...
Ertesinde Katonqaraǵaıda jińgir toı bastaldy. Báıge, kókpar, aýdaryspaq...
Kókpardan birinshi oryndy Ulan aýdanynyń komandasy qanjyǵaǵa basty. Ekinshi oryndy Samar aýdanynyń kókparshylary enshilese, úshinshi oryndy Rıdder qalasynan kelgen jigitter qanaǵat tutty.
Birinshi oryn alǵan kókparshylardyń qýanyshtary qoıyndaryna syımady
Bul kúni saýda da qyzyp turǵan.
Aýdan-aýdandardan qolóner sheberleri kórme ákelgen. Glýbokoe aýdanynan kelgen sheber Nurjan Eshojın torsyqtyń paıdasy týraly aıtty.
Tús aýa 25 shaqyrymdyq alaman báıgeni kórýge jınalǵan jurtta qısap bolmady.
Márege birinshi bolyp kelgen tulpar ıesin sý jańa avtokólik kútip turǵan. Aıta keteıik, myń orynǵa shaqtalǵan ıppodrom festıval qarsańynda kásipkerlerdiń kúshimen jóndeldi. Sondaı-aq, ulttyq oıyndardyń júldesi de kásipkerlerdiń demeýshiligimen júzege asty.
Máre syzyǵyn birinshi bolyp kesken shabandozdardy jýrnalıster qaýymy suraqtyń astyna aldy. Alaman báıgede birinshi bolyp Tarbaǵataı aýdanynyń sáıgúligi keldi. Ekinshi oryndy Kúrshim, úshinshi oryndy Zaısan aýdanynyń arǵymaǵy aldy.
Túske qaraı jurt aıtys kórýge jınaldy. Ine shanshyr oryn joq. Keıbireýler jerge tósenish salyp, jambastap jatyp tamashalady.
Aqyndar Altaıdyń tarıhynan tartyp búginine deıin jyrǵa qosty. Tartysty aıtys kórgen kórermenniń aıyzy bir qandy-aý.
Dúbirli sharada jurttyń biri toı kórse, endi biriniń qonaq kútýden qoldary qalt etpedi...
Al keshki gala konsert óte joǵary deńgeıde ótti. Túrki áleminiń tutas tarıhy jınaqtalǵan prologpen bastalǵan konsert rasymen de Altaı – túrki jurtynyń altyn besigi ekendigin sezdirip turdy.
Oblys ákimi Nurymbet Saqtaǵanov halyqty quttyqtap, sharanyń mańyzdylyǵyn aıtty. Saha elinen kelgen eń kishkentaı ónerpaz Arhan Ýıgýǵa dombyra syılady. Jeti jastaǵy ónerpaz «Dombyra» ánimen tanymal.
Kesh sońyn ádettegideı Mýzart toby «О́z elim» ánimen japty.
Shyǵys Qazaqstan oblysy,
Katonqaraǵaı aýdany
